Reseı, Ózbekstan, Qyrǵyzstan, Túrikmenstan, Qytaımen shekaradaǵy beketter qashan jańǵyrtylady
«Búgingi kúni Infraqurylymdy damytýdyń 2020-2025 jyldarǵa «Nurly jol» memlekettik baǵdarlamasy aıasynda Qazaqstan Respýblıkasynyń memlekettik shekarasyndaǵy ótkizý pýnkteriniń ınfraqurylymyn damytý jáne tehnıkalyq jaraqtandyrý kózdelgen. Osylaısha, Reseı Federatsııasymen shekarada 2020-2025 jyldar aralyǵynda kezeń-kezeńimen 27 avtomobıl jáne 11 temirjol ótkizý pýnktilerin rekonstrýktsııalaý josparlanýda. Osy sharalardy iske asyrý Indýstrııa jáne ınfraqurylymdyq damý mınıstrligi men Reseı Federatsııasy Kólik mınıstrliginiń arasyndaǵy ótkizý pýnktileriniń jumys isteýi jónindegi birlesken is-qımyl jospary aıasynda júrgiziledi», - dedi Premer-Mınıstr.
Úkimet basshysynyń atap ótýinshe, atalǵan jospardy iske asyrý úshin mınıstrlik rekonstrýktsııalaýdyń naqty merzimderi men júzege asyrý kezeńderi aıqyndalǵan Ótkizý pýnkterin rekonstrýktsııalaý jónindegi jol kartasyn ázirledi jáne oǵan qol qoıdy. Ol Reseı Federatsııasynyń Kólik mınıstrliginde qol qoıylý satysynda.
«Aıaqtalýy osy jyldyń sońyna kózdelgen Qyrǵyzstanmen shekarada «Qordaı» ótkizý pýnktin rekonstrýktsııalaý josparlanǵan. Bul rette Qazaqstan-Qyrǵyzstan shekarasyndaǵy qalǵan ótkizý pýnktterin rekonstrýktsııalaýdy 2025 jyldyń sońyna deıin iske asyrý josparlanýda. Sondaı-aq 2020 jyldyń sońyna deıin bıýdjettik qarajat esebinen Qazaqstan-Ózbekstan shekarasyndaǵy «B. Qonysbaev» ótkizý pýnktin rekonstrýktsııalaý jáne tehnıkalyq jaraqtandyrý jumystaryn aıaqtaý josparlanýda. Qytaı Halyq Respýblıkasynyń Úkimettik jeńildik qaryzy aýqymynda Qytaı Halyq Respýblıkasynyń (4 avtomobıl jáne 1 temirjol), Ózbekstan Respýblıkasynyń (4 avtomobıl), Túrkimenstan Respýblıkasynyń (1 avtomobıl) shekaralarynda 10 avtomobıl jáne 1 temirjol ótkizý pýnktin jańǵyrtý jáne tehnıkalyq jaraqtandyrý júrgizý josparlanýda»,- dedi Asqar Mamın.
Aıta keteıik, Senat depýtattarynyń Premer-Mınıstr atyna joldanǵan saýalynda ótkizý beketterindegi kemshilikter atap ótilgen.
«Jaǵdaıdy jaqsartý baǵytynda azdap ilgerileýshilik bar, ony aıta ketkenimiz jón, biraq jalpy jaǵdaı qanaǵattanarlyqsyz. Memlekettik shekara arqyly ótetin 27 temirjol ótkizý pýnktiniń tek 4-eýi ǵana belgilengen talaptarǵa saıkes keledi. Reseımen shekaradaǵy 20 temirjol ótkizý pýnktiniń ınfraqurylymy áli de jóndeýdi talap etedi. Bul sózsiz shekaralyq baqylaýdyń sapasyna áser tıgizedi. Avtokólik ótkizý pýnktteriniń ınfraqurylymynyń talaptarǵa saı kelmeýine baılanysty (barlyǵy 52, onyń ishinde QHR shekarada – 5 jáne «Qorǵas» ShYHO-nyń 1 ótkizý pýnkti, QR - 7, ÓR - 8, TR - 1, RF - 30) Reseı, Qyrǵyzstan jáne Ózbekstanmen shekarada júk kólik quraldarynan keptelister jıi bolyp turady», - dedi senatorlar.
