Reseı, Ózbekstan, Qytaı jáne Eýropadan tarıhı muralar qaıtarylady – Mınıstr

ASTANA. KAZINFORM – Reseı, Ózbekstan, Qytaı jáne Eýropanyń birqatar elinen tarıhı qundy muralardy qaıtarý jumystary bastaldy. Bul týraly QR Mádenıet jáne aqparat mınıstri Aıda Balaeva aıtyp berdi. 

«Biz mádenı nysandarymyzdyń jaı-kúıin barynsha jóndep, laıyqty deńgeıge shyǵarýymyz kerek. Bul jumys kezeń-kezeńimen jasalady. Qazirge deıin elimizdegi 3 mýzeıdiń ǵımaratymen qatar ishki ekspozıtsııasyn zaman talabyna sáıkes modernızatsııalaý kózdelgen. Ulttyq mýzeı janynan ultymyzdyń san ǵasyrlyq tarıhynan syr shertetin qundylyqtarymyzdyń ómirsheńdigin saqtap qalýǵa jaǵdaı jasaıtyn aýqymdy restavratsııa ortalyǵy qurylady. Óıtkeni, bul tarıhı muralardy qalpyna keltirý, qorǵaý, nasıhattaý úshin mańyzdy», - dedi A. Balaeva Qazmedıa ortalyǵynda mınıstrliktiń alqa otyrysynda.

Sonymen birge olardyń ishki mazmunyn baıytýǵa erekshe kóńil bólinedi.

«Sondyqtan alys-jaqyn shetelderdegi bizdiń tarıhı qundy muralarymyzdy qaıtarý mınıstrliktiń basty nazarynda bolmaq. Kezinde túrli tarıhı jaǵdaılarmen shetel asqan ulttyq baılyǵymyzdy otanǵa oraltý basym baǵyt bolyp qala beredi. Árıne, bul jumystar halyqaralyq zańnamaǵa sáıkes júrgiziledi, áıtse de biz búginde Reseı, Ózbekstan, Qytaı jáne Eýropanyń birqatar elimen tıisti jumystardy bastap kettik», - dedi mınıstr.