Reseı ózbek mıgranttarynan emtıxan qabyldaıtyn boldy
ASTANA. QazAqparat - Reseı men Ózbekstan úkimetteri arasyndaǵy kelisimge sáıkes, eńbek mıgranttary aldymen óz elinde arnaıy daıyndyqtan ótedi. Arnaıy emtıxandy da tapsyrýǵa týra keledi.
RF Memlekettik dýmasy ondaı kelisimdi alǵash ret ratıfıkatsııalap otyr, dep xabarlaıdy QazAqparat tilshisi Uz.uz saıtyna silteme jasap.
Atalǵan qujatqa sáıkes, Ózbekstan azamattaryna Reseıde jumysqa turý máseleleri boıynsha jan-jaqty aqparat beriledi. Úmitkerlerdi irikteý, eńbek kelisimshartyn jasatý - bári-bári jumys berýshilermen pysyqtalady. Tipti, Reseıdiń bilim berý júıesi boıynsha oqytý men keshendi emtıxan tapsyrý sharalary da qarastyrylǵan.
Budan bólek, eńbek mıgranttarynyń densaýlyǵy, xalyqaralyq izdeýde bar-joǵy, isti bolǵany, ıa bolmaǵany jan-jaqty tekseriledi. Al synaqtan súrinbeı ótkender úshin Reseıdegi jumys ornyna deıin jetkizip ǵana qoımaı, Ózbekstanǵa qaıtarý sharalary da atqarylady.
Aıta ketken jón, Reseı sheteldik azamattardy ýaqytsha jumysqa júıeli túrde tartý týraly kelisimdi alǵash ret rásimdep otyr. Atalǵan qujatta osy eldiń múddesi tolyǵymen eskerilgen.
