Reseı OSK: «Edınaıa Rossııa» Memlekettik dýmada 355 oryn alýy múmkin

RF Ortalyq saılaý komıssııasynyń málimetinshe, hattamalardyń 95,18%-y óńdelgennen keıin «Edınaıa Rossııa» federaldyq tizim boıynsha 57,83% daýys jınap, bir mandatty 208 okrýgte jeńiske jetti. RF Kommýnıstik partııasy 13,81% daýys jınap, bir mandatty okrýgterde bes mandat aldy, LDPR – 8,98% jáne eki mandat, «Novye lıýdı» – 7,96%.

Osylaısha, aldyn ala málimet boıynsha, RF Kommýnıstik partııasy 40 depýtattyq oryn, LDPR – 25, «Novye lıýdı» – 20 oryn alady. «Spravedlıvaıa Rossııa» partııasy 4,96% daýys jınap, ázirge 5 paıyzdyq mejeden óte almady, alaıda bir mandatty tórt okrýgte jeńiske jetti. Daýystardy odan ári sanaý qorytyndysy boıynsha partııanyń Memlekettik Dýmaǵa ótý múmkindigi saqtalady.

Saılaýdyń túpkilikti qorytyndysyn OSK 25 qyrkúıekte shyǵarýdy josparlap otyr. OSK tóraǵasy Ella Pamfılovanyń aıtýynsha, qalǵan hattamalar aldyn ala nátıjelerge azdaǵan túzetýler engizýi múmkin.

Pamfılovanyń málimetinshe, daýys berýge 62,6 mln-nan astam adam qatysty. Bul rette qashyqtan elektrondy daýys berýge qatysý kórsetkishi 90,88%-dy qurady – 3,65 mln-nan astam saılaýshy onlaın daýys bergen.

Sonymen qatar daýys berý barysynda jekelegen zań buzýshylyqtar tirkeldi. OSK málimetinshe, Marıı El, ıAkýtııa respýblıkalarynda, Máskeý oblysy men Sankt-Peterbýrgte ýchaskelik saılaý komıssııalarynyń 17 múshesi jumystan shettetildi. Olardyń qatarynda bıýlletenderdi qasaqana búldirý, saılaý qujattary salynǵan seıf-paketterdi zaqymdaý, sondaı-aq saılaýshylar tizimderi men statsıonarlyq daýys berý jáshikteriniń ishin zańsyz foto jáne beınetaspaǵa túsirý faktileri boldy. Sheshimder sot qaýlylary negizinde qabyldanǵan.

Budan bólek, Reseıdiń 12 sýbektisindegi 20 saılaý ýchaskesinde 36 850 bıýlleten jaramsyz dep tanyldy. OSK Qyrym men Marıı Elde bıýlletenderdi jáshikke jappaı salýdyń eki jaǵdaıy tirkelgenin habarlady. Bul rette saılaý ýchaskelerindegi daýys berý qorytyndylaryn jaramsyz dep taný jaǵdaılary tirkelgen joq.

Saılaýda barlyǵy 336 myńnan astam baqylaýshy jumys istedi.

OSK málimetinshe, segiz óńirdegi 15 baqylaýshy sot sheshimderi boıynsha ýchaskelerden shyǵaryldy. Buǵan saılaý komıssııalarynyń jumysyna aralasý, daýys berýge kedergi keltirý, janjal týǵyzý jáne foto-beınetúsirilim júrgizýdiń belgilengen tártibin buzý sebep bolǵan.

Pamfılova ótken saılaý naýqanyn syrtqy qaýip-qaterler deńgeıi boıynsha eń kúrdeli naýqandardyń biri dep atady.

Onyń baǵalaýynsha, saılaý júıesine jasalǵan kıbershabýyldar buryn-sońdy bolmaǵan deńgeıde kúsheıgen. Sonymen qatar onyń aıtýynsha, azamattar bul qaýipterdiń daýys berý protsesine yqpalyn is júzinde sezinbegen.

Saılaý aıaqtalǵannan keıin Reseıdiń parlamenttik partııalary Memlekettik Dýmanyń jańa shaqyrylymyndaǵy basshylyq organdarynyń quramyn talqylaýǵa kiristi. LDPR tóraǵasy Leonıd Slýtskıı partııa jańa shaqyrylymdaǵy fraktsııasyn saqtaıtynyn jáne buǵan deıin partııadan shyqqan nemese shyǵarylǵan depýtattar men partııa belsendilerin qaıta qabyldaýdy josparlamaıtynyn málimdedi.

Onyń aıtýynsha, sondaı-aq Jýravlevpen onyń Memlekettik Dýmadaǵy LDPR fraktsııasynyń quramyna kirý múmkindigi talqylanady.

Slýtskıı LDPR-diń 2021 jylǵy Memlekettik Dýma saılaýymen salystyrǵanda nátıjesin jaqsartqanyn atap ótti.

Onyń aıtýynsha, partııanyń federaldyq saılaý shtabynyń jetekshisi Marııa Voropaeva Memlekettik Dýmanyń toǵyzynshy shaqyrylymynda LDPR atynan vıtse-spıker bolady.

«Edınaıa Rossııa» partııasynda osy aptada Memlekettik Dýmanyń tóraǵasy, fraktsııa jetekshisi jáne komıtet tóraǵalary laýazymdaryna kandıdattar boıynsha sheshimder qabyldanady dep kútiledi. Memlekettik Dýmanyń qazirgi tóraǵasy Vıacheslav Volodın depýtat bolyp qaıta saılandy: daýystardy 100% sanaý qorytyndysy boıynsha Saratov bir mandatty okrýginde ol 82,84% daýys jınady.

Kelesi federaldyq saılaý naýqany 2027 jyly biryńǵaı daýys berý kúni aıasynda ótedi. Sol kezde Reseıdiń on sýbektisinde joǵary laýazymdy tulǵalardy saılaý ótkiziledi.

Buǵan deıin Toqaevtyń Pýtındi Memlekettik Dýma saılaýynyń ótýimen quttyqtaǵany týraly jazǵan bolatynbyz.