Reseı, Nıgerııa, Túrkııa: Qazaqstan mal terisin qaı elderge eksporttap otyr

ASTANA. KAZINFORM – Aýyl sharýashylyǵy mınıstrligi Kazinform saýalyna joldaǵan jaýapta Qazaqstannan mal terisi qaı elderge eksporttalatynyn málim etti.

- 2023 jyldyń qorytyndysy boıynsha 2 mln 548,5 myń dana iri qara terisi óndirildi. Onyń 8%-y (208,3 myń dana) qaıta óńdeýge jiberilse, 13,7%-y (349,6 myń dana) Reseı Federatsııasyna, Túrkııaǵa, Qyrǵyzstanǵa, Nıgerııaǵa eksporttaldy. Al Reseıden 4,5 myń dana teri ımporttalǵan. Óndirilgen teriniń 78%-y (1 mln 997,1 myń danasy) – óńdelmegen qaldyq. Osylaısha iri qara terisiniń 8%-y ǵana óńdeledi, ıaǵnı shıkizat kólemi salanyń óńdeý men ótkizý múmkindiginen aıtarlyqtaı joǵary, - dep jazady mınıstrliktegiler.

Óńdeýge ketken 208 myń dana terini eldegi 9 kásiporyn bólip alǵan deýge bolady. Bul kásiporyndardyń jobalyq qýaty elde jyl saıyn óndiriletin teriniń kóleminen de joǵary. Biraq júkteme deńgeıi óte tómen.

- Respýblıkada terini bastapqy óńdeıtin 9 kásiporyn jumys isteıdi. Óńdeýshi kásiporyndardyń qýattylyǵy 3,3 mln danaǵa deıin iri qara terisin, 4 mln dana usaq maldyń astam terisin óńdeýge múmkindik beredi. 2023 jyly júktelý 6,3% boldy, - dep jazylǵan jaýapta.

Buǵan deıin vedomstvodaǵylar elde sıyr terisiniń 84 paıyzy bosqa qalyp jatyr degen málimet taratqan edi.