Reseı naryǵynda halal atyn jamylǵan ónimderge tosqaýyl qoıylatyn boldy
ASTANA. 26 aqpan. QazAqparat - Ótken aptada Reseı múftıler keńesiniń (RMK) saraıynda osy keńestiń tóraǵasy, sheıh Ravıl Gaınýtdın «Halal» atty halyqaralyq standarttaý jáne sertıfıkattaý ortalyǵynyń bas dırektory Aıdar qajy Ǵazızben kezdesti. Bul jaıynda RMK baspasóz qyzmeti habar taratty.
muslim.kz saıtynyń jazýynsha, kezdesý barysynda olar RF aýmaǵyndaǵy halal salasynyń damý jaıyn sóz etip, ózekti máselelerdi sheshý joldaryn izdestirdi. Naqtyraq aıtqanda, mundaı máselelerdiń qatarynda naryqty teris pıǵyldy óndirýshilerden qorǵaý (qazirgi ýaqytta bul mindet «Halal» halyqaralyq standarttaý jáne sertıfıkattaý ortalyǵy men RMK yntymaqtastyǵy aıasynda sheshilip jatyr), sondaı-aq, shetel naryǵyna shyǵýǵa múmkindik beretin jáne ózge de jeńildikterdi alǵa tartyp, aıla-sharǵymen óndirýshiniń basyn aınaldyratyn túbi shıki sertıfıkattaý organdarymen kúresý máselesi de bar.
«Halal» men RMK ókilderine belgili bolǵandaı, reseılik naryqta qoldanysta joq standarttarmen óndiriske jol ashatyn uıymdar (ókinishke qaraı, olardyń qatarynda dinı uıymdardyń bar ekenin aıta ketý kerek) paıda boldy. Arnaıy ruqsaty bolmasa da ózderin halyqaralyq uıym retinde tanytý arqyly tek halal óndirisiniń abyroıyna ǵana emes, sonymen birge, Islam atyna da kir keltirip júr.
RMK tóraǵasy «Halal» qyzmetine jáne halal atyna kir keltirip júrgendermen kúresý sharalaryna qoldaý kórsetetinin jetkizdi.
Kezdesý sońynda Aıdar qajy Reseı musylmandarynyń rýhanı jetekshisi, sheıh Ravıl Gaınýtdınge «Halal» ındýstrııasynyń damýyna úles qosyp, qoldaý kórsetkeni úshin alǵysyn bildirdi.
