Reseı munaıyn Qytaıǵa Qazaqstan arqyly tasymaldaýǵa qatysty ózgerister engizildi
ASTANA. KAZINFORM – Senat Reseı munaıyn Qazaqstan aýmaǵy arqyly Qytaıǵa tasymaldaýdy retteıtin úkimetaralyq kelisim týraly zańdy maquldady.
Qujatty áriptesterine Senattyń Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Súıindik Aldashev tanystyrdy.
«Atalǵan hattamaǵa sáıkes Reseı munaıyn Qazaqstan Respýblıkasynyń aýmaǵy arqyly Qytaı Halyq Respýblıkasyna tasymaldaý jónindegi Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy 2013 jylǵy jasalǵan kelisimniń qoldaný merzimin 2034 jylǵa deıin uzartý jáne de munaı tranzıtiniń kólemin, tarıfti ózektendirý máselelerine qatysty kelisimge ózgerister engizý kózdeledi.
2023 jyldyń aqpanynda Reseı tarapy (Rosneft) 10 jyldyq kezeńge 100 mln tonna jetkizý týraly Qytaı tarapymen (SPNS) kelisimin uzartyp, qol qoıdy. Osyǵan baılanysty, 2023 jyldyń maýsymynda Sankt-Peterbýrg qalasynda Qazaqstan Respýblıkasy men Reseı Federatsııasy ekijaqty kelisimge ózgerister engizý týraly hattamaǵa qol qoıyldy. Hattamada munaı tranzıtiniń kólemin jáne tarıfti ózektendirý máselelerine qatysty kelisimge ózgerister engizý kózdeledi», - dedi depýtat.
Ol ózgeristerdiń negizleri tómendegideı:
1. Tasymaldanatyn munaı kólemi jylyna 7 mln tonnadan, 10 mln tonnaǵa deıin ósedi.
2. Túımazy – Omsk – Novosıbırsk munaı qubyrynyń Qazaqstandyq ýchaskesinde munaı tasymaldaý tarıfi 2,1 dollar bolyp belgilendi.
3. Qazaqstan aýmaǵy boıynsha tasymaldanatyn munaı tarıfi tonnasyna 15 dollar quraıdy.
4. Kelisimniń qoldanylý merzimi 2034 jylǵy 1 qańtarǵa deıin uzartylady.
5. Qazaqstan tarapy munaı tasymaldaý jónindegi kórsetiletin qyzmetterge nóldik mólsherleme boıynsha qosylǵan qun salyǵyn salady.
«Bul rette Qazaqstan tarapy Qazaqstan Respýblıkasynyń salyq zańnamasyna sáıkes qosylǵan qun salyǵyn qaıtarý maqsaty úshin munaıdy tasymaldaý baǵyty boıynsha tasymaldaý jónindegi kórsetiletin qyzmetterdi halyqaralyq tasymal retinde qarastyrady», - dedi Súıindik Aldashev.
Senat depýtattary zańdy maquldaý týraly sheshim qabyldady.