Reseı munaı-hımııa ónimderiniń jekelegen túrlerin áketýge tyıym saldy
MÁSKEÝ. Kazinform — Reseı úkimeti Eýrazııalyq ekonomıkalyq odaqtan tys jerlerge munaı-hımııa ónimderiniń jekelegen túrlerin áketýge ýaqytsha tyıym saldy, dep habarlaıdy agenttik tilshisi Reseı úkimeti baspasóz qyzmetine silteme jasap.
Shekteý úsh aıǵa engiziledi. Úkimettiń habarlaýynsha, sheshim reseılik ónerkásip kásiporyndaryn shıkizatpen turaqty qamtamasyz etýge baǵyttalǵan.
Tyıym tas kómirden jáne munaıdan alynatyn benzoldy, tolýoldy, ortoksıloldy, paraksıloldy jáne fenoldy áketýge qatysty.
— Olar, atap aıtqanda, avtomobıl, avıatsııa, keme jasaý jáne temirjol mashına jasaý salalaryna arnalǵan lak-boıaý jabyndaryn, azyq-túlik ónimderine arnalǵan qaptamalardy, eden jabyndaryn jáne kabel ónimine arnalǵan oqshaýlaǵysh materıaldardy óndirýde, sondaı-aq medıtsına ónerkásibinde qoldanylady, — delingen habarlamada.
Shara munaı-hımııa ónimderin halyqaralyq tranzıttik tasymal sheńberinde áketýge, halyqaralyq gýmanıtarlyq kómek jelisi boıynsha jetkizýge, sondaı-aq Shpıtsbergen arhıpelagyndaǵy reseılik uıymdardyń qyzmetin qamtamasyz etýge qatysty qoldanylmaıdy, dep naqtylady úkimette.
Eske salaıyq, buǵan deıin Reseı dızel otynyn eksporttaýǵa salynǵan tyıymdy uzartqanyn habarlaǵan edik.
