Reseı men Ýkraınadan densaýlyqqa zııandy qus eti ákelinýde - AShM

ASTANA. 20 tamyz. QazAqparat - Reseı men ýkraındyq qus etin óndirýshi kompanııalar ónimderine sý engizý arqyly olardyń kólemi men salmaǵyn arttyryp, Qazaqstanǵa satýda. Sonyń nátıjesinde otandyq qus ónimderiniń satylý kólemi shamamen 30 paıyzǵa tómendep ketken.

Bul týraly búgin QR Aýyl sharýashylyǵy mınıstrliginde ótken baspasóz máslıhatynda atalǵan vedomstvonyń vıtse-mınıstri Gúlmıra Isaeva aıtty.

Onyń málimetinshe, úsh aılyq tekseris nátıjesinde Ýkraınanyń «Mıronovskaıa ptıtsefabrıkasynan» ákelingen qus etinde 9,9 %, Reseıdiń «Belaıa ptıtsa» fabrıkasynyń óniminde - 16,8 %, «Agromars eksımniń» (Ýkraına) ónimderinde - 10,7 % sý tabylǵan.

Sonymen qatar, vıtse-mınıstrdiń aıtýynsha, bul az bolǵandaı, atalǵan ónimderden ishek taıaqshalary tobynyń bakterııalary, mezofıldi aerobtyq jáne fakýltatıvtik-anaerobtyq mıkroaǵzalardyń kóp kólemi anyqtalyp, olar densaýlyqqa asa zııandy ekendigi dáleldengen.

«Іshki naryq saýda nysandarynan tańdalǵan qus etiniń synamalarynda ishek taıaqshalary men basqa da zııandy mıkroaǵzalar tabyldy. Bul ónimder Ýkraınanyń «Mıronovskaıa ptıtsefabrıkasynan», Reseıdiń «Altaıskıı broıler» jáne «Prıoskole» kásiporyndarynan ákelingen», - dep atap ótti ol.

Vedomstvonyń habarlaýynsha, kúsheıtilgen zerthanalyq baqylaý rejımine Ýkraınanyń 3 kásiporny kirgen. Atalmysh rejım veterınarlyq-sanıtarlyq talaptardyń zerthanalyq zertteýleriniń, óniminiń qaýipsizdik normalaryna jáne únemi júrgizilgen tekseris barysyna engizildi. Ótkizilgen tekserister barysynda ımporttyq qus eti tehnıkalyq reglament talaptarynyń markileýine sáıkessizdigi anyqtalǵan. Naqty aıtqanda, memlekettik tilde aqparattyń bolmaýy jáne ony óndirýshi eldiń kórsetken aqparatyna saı kelmeýi, óndirilgen kúni men saqtaý merzimderi kórsetilmegen.

«Osy oqıǵalarǵa baılanysty júrgizilgen veterınarlyq tekserister barysynda 52 tonnaǵa jýyq sapasyz qus eti anyqtalyp, joıyldy», - dep atap ótti Veterınarlyq baqylaý jáne qadaǵalaý komıtetiniń basqarma basshysy Serik Saparǵalıev.