ShQO-da 9 jyl boıy izdeýde júrgen qylmysker áýejaıda ustaldy

ÓSKEMEN. KAZINFORM – Shyǵys Qazaqstan oblysynyń polıtseıleri 2016 jyldan beri izdeýde júrgen 38 jastaǵy azamatty áýejaıda ustady.

Belgili bolǵandaı, ol alaıaqtyq jasap, 5 mln teńge paıda kórdi degen kúdikke ilingen.

- Qylmystyq is materıaldaryna sáıkes, er adam jábirlenýshiniń senimine kire otyryp, ony aldap, aqshasyn qaltaǵa basqan. Osy jyldar ishinde ol ádil sottan jaltaryp júrdi. Turǵylyqty jerin jıi aýystyryp otyrǵan jáne qoǵamdyq oryndardan ádeıi boı tasalap júrgen, - dep habarlady ShQO Polıtsııa departamentiniń baspasóz qyzmetinen.

Jedel-izdestirý sharalary barysynda polıtseıler kúdiktini Óskemen qalasyna ushyp kelgen sátinde áýejaıdan ustady.

Qazirgi ýaqytta er adam ýaqytsha ustaý ızolıatoryna qamaldy. Tergeý amaldary júrgizilip jatyr.

Eske salsaq, «Azııa Avto» kompanııasynyń burynǵy basshysy syrttaı 9 jylǵa bas bostandyǵynan aıyrylǵany habarlanǵan.