Reseı men Ýkraına kelissóziniń ekinshi raýndy Ystanbulda ótýi múmkin
ASTANA. KAZINFORM — RF Syrtqy ister mınıstri Sergeı Lavrov Reseı barlyq aspektiler boıynsha óz ustanymyn bildiretin tıisti memorandým ázirlegenin jáne ony 2 maýsymda ýkraınalyq tarapqa Ystanbulda berýge daıyn ekenin málimdedi, dep habarlaıdy Kazinform RF syrtqysaıası vedomstvosynyń saıtyna silteme jasap.
Reseı prezıdentiniń kómekshisi V.Medınskıı bastaǵan reseılik delegatsııa kelesi dúısenbi, 2 maýsymda Ystanbulda qaıta jalǵasatyn tikeleı kelissózdiń ekinshi raýndy barysynda Ýkraına delegatsııasyna osy memorandýmdy usynýǵa jáne qajetti túsiniktemelerdi berýge daıyn ekeni aıtylǵan.
— AQSh, Saýd Arabııasy jáne Túrkııanyń qoldaýymen Reseı-Ýkraına tikeleı kelissózin qaıta bastaýǵa jaǵdaı jasaý múmkin boldy. Birinshi raýnd aǵymdaǵy jyldyń 16 mamyrynda Ystanbulda ótti, — dep eske saldy S. Lavrov.
Ol sondaı-aq sol jerde qol jetkizilgen kelisimderge sáıkes «1000 adamǵa 1000» formatynda tutqyndar almasý júrgizilgenin atap ótti. Sol kezde Ystanbulda Máskeý men Kıev turaqty retteýge qol jetkizý úshin ár taraptyń ustanymyn kórsetetin qujattar ázirlenetini kelisildi.
RF prezıdentiniń kómekshisi V.Medınskıı sársenbi kúni Ýkraına qorǵanys mınıstri R.Ýmerovke memorandýmdar almasý úshin kezdesýdiń naqty kúni men ornyn usynǵanyn habarlady.
Ol sondaı-aq atysty yqtımal toqtatý týraly pakettik kelisimniń árbir tarmaǵy boıynsha mazmundy talqylaýdy bastaýǵa daıyn ekenin atap ótti. Olar rastaýdy kútýde jáne ózderi belgilegen kúni jeke kezdesýge jáne jumysqa kirisýge daıyn.
RF SІM resmı ókili Marııa Zaharova Reseıdiń Kıevpen retteý týraly memorandým jobalaryn almasýda basqa eldermen deldaldyq kelisimi joq ekenin málimdedi.
Óz kezeginde Ýkraına qorǵanys mınıstri Rýstem Ýmerov áleýmettik jelidegi paraqshasynda reseılik tarapqa Ýkraınanyń ustanymyn kórsetetin qaqtyǵysty retteý týraly memorandým jobasyn tapsyrǵanyn habarlady. Ol sondaı-aq Ýkraınanyń atysty tolyq jáne sózsiz toqtatýǵa jáne odan ári dıplomatııalyq jumysqa daıyndyǵyn rastaıtynyn jazdy.
Buǵan deıin 15 mamyr Reseı-Ýkraına qaqtyǵysy tarıhyndaǵy betburys kezeńi bolýy múmkin ekenin jazǵan bolatynbyz.
Ystanbulda josparlanǵan Reseı-Ýkraına kelissózi memleket basshylarynyń qatysýynsyz bastaldy.