Reseı men Ýkraına qaqtyǵysy «Qazatomónerkásiptiń» qyzmetine áser ete me
Onyń aıtýynsha, kompanııanyń barlyq kásiporyndary qaýipsizdikti qamtamasyz etý úshin der kezinde qabyldanǵan sharalardyń arqasynda úzilissiz jumys istedi jáne istep tur.
«Qazatomónerkásiptiń reseılik kompanııalarmen birlesken kásiporyndary bar, biraq olarmen yntymaqtastyqta qandaı da bir ózgerister bolady dep oılamaımyz. Qazatomónerkásip óniminiń bir bóligin tasymaldaý Reseı Federatsııasynyń aýmaǵy arqyly júzege asyrylady. Qazirgi ýaqytta tasymaldaý bóliginde qandaı da bir shekteýler baıqalǵan joq. Alaıda, kompanııada buryn sátti paıdalanylǵan balamaly tasymaldaý marshrýttary bar ekenin de aıtqym keledi», - dedi M.Sháripov kompanııanyń 2021 jylǵy jumys qorytyndysy týraly baspasóz máslıhatynda.
Onyń aıtýynsha, teńgeniń álsireýi de Qazatomónerkásiptiń qarjylyq jaǵdaıyna aıtarlyqtaı áser etpeıdi, óıtkeni kompanııa paıdany negizinen AQSh dollarymen alady.
Bul aıyrbas baǵamynyń aýytqýlaryna baılanysty táýekelderden saqtaıdy.
«Árıne, bolyp jatqan jaǵdaılar belgisizdik týdyrady. Biz oqıǵalardyń qalaı órbıtinin jáne bolashaqta kompanııanyń qarjylyq jaǵdaıyna nemese operatsııalyq qyzmetine qandaı áser etetinin boljaı almaımyz. Alaıda biz qazirgi jaǵdaıdy jiti qadaǵalap otyramyz jáne táýekelderdi azaıtyp, qyzmetimizdiń turaqtylyǵy men tıimdiligin qamtamasyz etetin sheshimder qabyldaýǵa daıynbyz», - deıdi Qazatomónerkásip basshysy.
Qazatomónerkásip tabıǵı ýran óndiretin álemdegi eń iri ýran óndirýshi bolyp sanalady. Toptyń saladaǵy eń iri rezervtik ýran bazasy bar. Qazatomónerkásip enshiles, basybaıly jáne birlesken uıymdarmen birge 14 ýran óndirýshi kásiporynǵa biriktirilgen 26 ken ornyn ıgerýde. Barlyq ýran óndirýshi kásiporyndar Qazaqstan Respýblıkasy aýmaǵynda ornalasqan jáne ýran óndirý kezinde jerasty uńǵymalyq shaımalaý tehnologııasyn qoldanady.
Qazatomónerkásiptiń baǵaly qaǵazdary London qor bırjasynda, Astana International Exchange bırjasynda jáne Qazaqstan qor bırjasynda ornalastyrylǵan.
Qazatomónerkásip Qazaqstan Respýblıkasynyń Ulttyq atom kompanııasy jáne toptyń negizgi klıentteri – atom óndirýshi qýattardyń operatorlary, al ónimder úshin negizgi eksporttyq naryqtar – Qytaı, Ońtústik jáne Shyǵys Azııa, Soltústik Amerıka jáne Eýropa bolyp otyr.
