Reseı men Ýkraına arasyndaǵy kelissózderdiń jańa kezeńi jaqyn ýaqytta ótedi
ASTANA. KAZINFORM — Jenevada ótken kelissózderdiń ekinshi kúni Reseı men Ýkraına ókilderiniń kezdesýi shamamen eki saǵatqa sozyldy. Bul týraly Reseı delegatsııasynyń basshysy Vladımır Medınskıı málimdedi, dep habarlaıdy DW.
Onyń aıtýynsha, kelissózder «qıyn, biraq iskerlik sıpatta» ótken.
— Ózderińiz bilesizder, kelissózder eki kúnge sozyldy: keshe túrli formatta óte uzaq ótti, búgin taǵy shamamen eki saǵat jalǵasty. Olar qıyn boldy, biraq iskerlik sıpatta ótti, — dedi ol jýrnalısterge.
Sonymen qatar Medınskıı kelissózderdiń jańa kezeńi jaqyn ýaqytta ótetinin atap ótti.
Ýkraına delegatsııasynyń jetekshisi — Ulttyq qaýipsizdik jáne qorǵanys keńesiniń hatshysy Rýstem Ýmerov kelissózderde ilgerileý bar ekenin jáne birqatar máseleler boıynsha aıqyndyq engizilgenin aıtty. Alaıda ol «qazirgi kezeńde egjeı-tegjeıin jarııalaýǵa bolmaıtynyn» jetkizdi.
Onyń sózinshe, reseılik tarappen ótken talqylaýlar «qarqyndy ári mazmundy» bolǵan.
— Kelesi qadam — ázirlengen sheshimderdi prezıdentterdiń qaraýyna usyný úshin qajetti konsensýs deńgeıine qol jetkizý, — dedi Ýmerov.
Jenevadaǵy eki kúndik kelissózderdiń qorytyndysy boıynsha Ýkraına prezıdenti Vladımır Zelenskıı áskerı baǵytta ilgerileý bar ekenin málimdedi.
Onyń aıtýynsha, eki el ókilderi «saıası erik bolsa» atysty toqtatýdy amerıkalyq taraptyń baqylaýymen qadaǵalaý máselesi boıynsha «derlik kelisimge kelgen».
Sondaı-aq Zelenskıı Jenevadaǵy kelissózderge eýropalyq elder ókilderiniń «keńirek» qatysýyn atap ótti.
— Biz úshin Eýropanyń qatysýy óte mańyzdy, — dedi ol.
Eske sala keteıik, Ýkraına prezıdenti aýmaqtyq máseleni sheshýde serpilis jasaý úshin Reseı basshysy Vladımır Pýtınmen kezdesýdi eń tıimdi jol dep ataǵan.
Osyǵan baılanysty ol kelissóz tobyna Jenevada eki kóshbasshynyń kezdesýin uıymdastyrý máselesin kóterýdi tapsyrǵan.
Buǵan deıin Reseı prezıdentiniń baspasóz hatshysy Dmıtrıı Peskov Pýtın men Zelenskııdiń kezdesýi tek Máskeýde ótýi múmkin ekenin málimdegen edi.
Aıta ketelik Ýkraına boıynsha úshjaqty kelissózder Jenevada bastalǵan edi.