Reseı men Ýkraına Abý-Dabıdegi kelissózden keıin tutqyn almasýǵa kelisti
ASTANA. KAZINFORM — BAÁ astanasynda AQSh-tyń araǵaaıyndyǵymen ótken dıplomatııalyq konsýltatsııalardyń sońǵy kezeńi aıaqtaldy, dep habarlaıdy Kazinform agenttiginiń menshikti tilshisi.
11 qarasha, sársenbi kúni Abý-Dabıde Reseı, Ýkraına jáne AQSh arasyndaǵy eki kúndik úshjaqty kelissózder aıaqtaldy. Qol jetkizilgen naqty nátıje aýqymdy tutqyn almasý týraly aldyn ala kelisim boldy.
Ekinshi kúngi kelissóz shamamen eki saǵatqa sozyldy, al keshe ótken alǵashqy kezdesý 4,5 saǵatqa sozylǵan.
Reseı delegatsııasynyń basshysy, Reseı prezıdentiniń kómekshisi Vladımır Medınskıı gýmanıtarlyq másele boıynsha prıntsıpti kelisimge qol jetkizilgenin málimdedi.
— Biz jańa aýqymdy tutqyn almasý týraly prıntsıpti kelisimge qol jetkizdik, onyń naqty parametrleri jaqyn arada jarııalanady, — degen Medınskııdiń sózin TASS jarııalady.
Ýkraına prezıdenti Vladımır Zelenskıı de jańa tutqyn almasýǵa daıyndyq bastalǵanyn rastady. Ol buǵan deıin taraptar eki jaqtan 1000-nan 1500-ge deıin tutqyn almasý múmkindigin talqylap jatqanyn habarlaǵan bolatyn.
Tutqyn almasýdyń sharttary áli tolyq kelisilgen joq.
AQSh ókili Djared Kýshner konsýltatsııalardyń nátıjelerin joǵary baǵalap, birqatar máseleler boıynsha ymyraǵa kelýge bolatyn tustar anyqtalǵanyn atap ótti.
— Keıbir salalarda biz ymyraǵa kelý múmkindikterin kórip otyrmyz, al basqalarynda odan ári talqylaýlar qajet. Biraq meniń oıymsha, osynyń ózi óte jaqsy qadam boldy, — dedi Kýshner.
Kýshner Máskeý men Kıev arasyndaǵy senimsizdik áli de úlken kedergi bolyp qala beretinin moıyndady. Onyń aıtýynsha, aýmaqtyq máseleler sheshý qıyn túıtkil bolyp otyr.
Kelissózderdiń negizgi taqyryptarynyń biri Eýropadaǵy bolashaq qaýipsizdik arhıtektýrasy jáne beıbitshilik kelisimine qol jetkizilgennen keıin qoldanylýy tıis kepildikter boldy.
Medınskıı taraptar qaýipsizdik máseleleri boıynsha óz ustanymyn bildirgenin jáne konsýltatsııalardy jalǵastyratynyn jetkizdi. Ol qatysýshylardyń barlyǵynyń múddelerin eskeretin jańa, zamanaýı qaýipsizdik júıesi qajet ekenin málimdedi.
Ýkraına tarapy qaýipsizdik kepildikteri jáne kelissózder formatyn Eýropa memleketterin qamtı otyryp keńeıtý múmkindigi talqylanǵanyn habarlady.
Dıplomatııalyq kúsh-jigerdiń kelesi kezeńinde AQSh ókilderi Reseı jáne Ýkraına basshylyǵymen jeke konsýltatsııalar ótkizbek.
Kýshner 12 qarashada AQSh prezıdentiniń arnaıy elshisi Stıv Ýıtkoffpen birge Máskeýge prezıdent Vladımır Pýtınmen kezdesýge baratynyn málimdedi.
Sodan keıin amerıkalyq dıplomattar Dýblınde Vladımır Zelenskıımen kelissóz júrgizýdi josparlap otyr.
Búgingi kezdesýden keıin Zelenskıı kelesidegi qadamdar Amerıka delegatsııasynyń Máskeýdegi konsýltatsııalarynan keıin anyqtalatynyn málimdedi. Ol sondaı-aq eýropalyq seriktesterdiń kelissóz protsesiniń barlyq kezeńderine qatysý qajettiligin atap ótti.
Bıyl úsh taraptyń qatysýymen ekinshi márte kelissóz ótip otyr, buǵan deıin aqpan aıynda Jenevada alǵashqy úshjaqty konsýltatsııalar ótken.
Saıası máseleler boıynsha túpkilikti kelisimderdiń bolmaýyna qaramastan, taraptar dıplomatııalyq dıalogty jalǵastyrýǵa nıetti ekenin rastady.
Eske sala keteıik, keshe AQSh tarapy Reseı, Qurama Shtattar jáne Ýkraına arasyndaǵy Ábý-Dabıdegi úshjaqty kelissózderdiń birinshi kúniniń nátıjesin oń baǵalaǵan bolatyn.
