Reseı men Túrkııa daǵdarysy rettelmese Astana protsesi bolmas edi - Túrkııa Prezıdentiniń kómekshisi
«Bul máseleni retteýge qatysqandar aýqymdy jumystardy atqardy. Osy rette kebir qadamdar nátıjeli bolsa, al keıbiri sátsiz aıaqtaldy. Sol kezdegi jaǵdaıdy esime ala otyryp, asa qurmetti Nursultan Nazarbaev bastapqydan ózin baısaldy ustap, barshasyn sabyrǵa shaqyryp, problemany tek ózara dıalog arqyly ǵana sheshýge aıryqsha ekpin qoıdy», - dep toqtaldy Túrkııa Prezıdentiniń kómekshisi Ibragım Kalyn.
Onyń sózine qaraǵanda, eger de Reseı men Túrkııa daǵdarysy áli kúnge deıin jalǵassa, onda Astana protsesi bolmas edi.
Óz kezeginde Túrkııa SІM basshysy Mevlıýt Chavýshoglý Nursultan Nazarbaevty barsha Túrki áleminiń aqsaqaly ekenin qadap aıtty. «Reseı men Túrkııa arasyndaǵy baılanystardy jandandyrýda Qazaqstan Prezıdenti negizgi sebepshi boldy. Ol óziniń kóshbasshylyq erekshe qasıetin kezekti ret kórsetti. Sondyqtan biz osy kómegi úshin árqashan da qaryzdarmyz», - dedi Túrkııa Syrtqy ister mınıstri.
Sonymen qatar derekti fılm barasynda túrik kásipkeri Nevzat Sarychılık atalǵan daǵdarysty sheshýdegi eńbegi úshin Elbasyǵa jeke alǵysyn jetkize kele, Túrkııa halqy Qazaqstan Prezıdentin óte qurmetteıtinin atap ótti.
Aıta keteıik, «Bitimger mıssııasy» - bul Prezıdent baspasóz qyzmeti men «Habar» telearnasynyń birlesken jobasy. Fılmde Túrkııanyń shekara aýmaǵyna kirip ketken Reseıdiń SÝ-24 ushaǵynyń atyp túsirilýinen keıin eki eldiń arasynda týyndaǵan shıelenisken ahýaldy retteýdiń qadamdar zerttelgen. Bul turǵyda Túrkııa men Reseı arasyndaǵy jaǵdaıdy retke keltirýge baǵyttalǵan Elbasy Nursultan Nazarbaevtyń aýqymdy ári parasatty eńbegi egjeı-tegjeıli baıandalady. Osy oraıda Túrkııa Respýblıkasynyń Prezıdenti Rejep Taıyp Erdoǵannyń taǵdyrsheshti hatyn RF Prezıdenti Vladımır Pýtınge jetkizý qadamy qalaı órbigendegi, osy mańyzdy iste taraptardyń atqarǵan qyzmeti tolyq kórsetilgen.
