Reseı men Tájikstan eńbek mıgratsııasy týraly kelisimge qol qoıdy
ASTANA. KAZINFORM – Vladımır Pýtın men Emomalı Rahmonnyń Dýshanbede ótken kelissóziniń qorytyndysy boıynsha Reseı men Tájikstan eńbek mıgratsııasy, onyń ishinde Reseı Federatsııasynda jumys isteý úshin medıtsınalyq tekserýden ótýge qatysty qujattarǵa qol qoıdy, dep habarlaıdy Kazinform menshikti tilshisi.
Kelisimge sáıkes, Reseıge jumys isteýge baratyn Tájikstan azamattary Dýshanbedegi medıtsınalyq uıymdardyń biriniń aýmaǵynda arnaıy pýnktte mindetti medıtsınalyq tekserýden óte alady. Protsedýranyń ózi Reseı Densaýlyq saqtaý mınıstrligi bekitken rásimderge sáıkes júrgiziledi. Reseıge kelgennen keıin qaıtalama medıtsınalyq tekserýden ótý qajet emes.
Budan basqa, 2019 jylǵy 17 sáýirdegi Tájikstan azamattaryn Reseı Federatsııasyna ýaqytsha jumysqa ornalastyrý úshin uıymdasqan túrde tartý týraly úkimetaralyq kelisimge ózgerister engizý týraly hattamaǵa qol qoıyldy.
Reseı Federatsııasy men Tájikstan basshylarynyń birlesken málimdemesinde atap ótilgendeı, bul qujat eki eldiń ózara múddeleri men qajettilikteri negizinde jumys kúshin uıymdasqan túrde tartý tetigin jetildirýge yqpal etýge baǵyttalǵan.
- Kelissóz qorytyndysy boıynsha biz yntymaqtastyqtyń mańyzdy salalary boıynsha ekijaqty qujattardyń aýqymdy paketine qol qoıdyq. Atap aıtqanda, eńbek kóshi-qony, osy saladaǵy yntymaqtastyqty damytýdyń sharttyq-quqyqtyq bazasyn nyǵaıtý jónindegi qujattarǵa qol qoıyldy, - dep atap ótti Tájikstan prezıdenti Emomalı Rahmon.
RF prezıdenti Vladımır Pýtın Reseıde 1 mln-nan astam tájik azamatynyń turyp jatqanyn jáne jumys isteıtinin málimdedi.
Eske sala ketsek, Reseı prezıdenti Vladımır Pýtın qazir memlekettik saparmen Tájikstanda júr. Joǵary deńgeıdegi kezdesýler men kelissózderdiń qorytyndysy boıynsha memleketaralyq, úkimetaralyq jáne vedomstvoaralyq 16 qujat qabyldandy.
Buǵan deıin memleket basshysy Qasym-Jomart Toqaev Dýshanbe qalasyna saparmen barǵanyn jazǵan bolatynbyz.