Reseı men Ózbekstan iri AES salý múmkindigin zerdeleıtin jumys tobyn qurdy

TAShKENT. KAZINFORM – «Rosatom» korporatsııasy men «Uzatom» agenttigi Ózbekstanda iri AES salý múmkindigin zerdeleýge ýaǵdalasty, dep habarlaıdy Kazinform agenttiginiń menshikti tilshisi.

Tıisti kelisimge «Rosatom» basshysy Alekseı Lıhachev pen «Uzatom» agenttiginiń dırektory Azım Ahmedhadjaev Sankt-Peterbýrg Halyqaralyq ekonomıkalyq forýmy aıasynda qol qoıdy. Ony salý jumysy qazirgi ýaqytta qolǵa alynǵan az qýatty atom elektr stantsııasynyń qurylysymen qatar órbıdi.

Úlken AES árqaısysynyń qýaty 1000 MVt bolatyn eki energobloktan turady, degenmen olardyń sanyn tórtke jetkizý múmkindigi de qarastyrylady.

- Kelisimge qol qoıý AES-ti salý múmkindigin tolyq zertteýge múmkindik beredi. Osy oraıda, jobanyń tehnıkalyq negizdemesin jáne onyń qunyn baǵalaýmen aınalysatyn birlesken jumys toby quryldy, - dedi «Uzatom» agenttiginiń dırektory Azım Ahmedhadjaev.

Jumys tobynyń taldaýy negizinde Ózbekstanda iri AES salýǵa qatysty naqty sheshim qabyldanady.

Eske salaıyq, buǵan deıin Ózbekstan bıligi iri AES salý múmkindigin qarastyryp jatqanyn jazǵan edik.

Sonymen qatar qazirgi ýaqytta resmı Tashkent az qýatty AES salýǵa kiristi. Árqaısysynyń qýaty 55 MVt bolatyn 6 reaktor (jalpy qýaty — 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.

Jaqynda Uzatom agenttiginiń dırektory Azım Ahmedhadjaev nysannyń quny 2 mlrd dollardan aspaıtynyn aıtty. Ózbekstan AES-ke qajetti salqyndatý júıesin Majarstannan alýdy josparlap otyr.

Osyǵan saı, Ózbekstan men Reseı AES salý kelisimshartynyń kúshine ený hattamasyna qol qoıdy.

Sondaı-aq, AES salý úshin halyqaralyq konsortsıým qurylady.