Reseı men Qytaı basshylary ekijaqty qatynasty nyǵaıtýǵa ýáde berdi
ASTANA. QazAqparat - Reseı Federatsııasynyń Prezıdenti V.Pýtın men Qytaı Halyq Respýblıkasynyń Tóraǵasy Sı Tszınpın ekijaqty qarym-qatynasty odan ári tereńdetýge ýáde berdi, dep habarlady VVS.
Beıjińde ótken Azııa-Tynyq muhıty aımaǵy ekonomıkalyq yqpaldastyǵy sammıti aıasynda júrgizilgen kelissózder barysynda eki el basshylary Qytaı men Reseıdiń ortaq múddesin talqylady.
«Biz Reseı-Qytaı dostyǵynyń jasyl aǵashyn birge kútip, baptadyq, endi kúz tústi, onyń jemisin jeıtin ýaqyty keldi», - dedi QHR tóraǵasy.
V.Pýtın óz sózinde ekijaqty qarym-qatynas eki el azamattarynyń baılanysyn nyǵaıtatynyn atap ótti.
Ol Reseı men Qytaıdyń saýda aınalymy aǵymdaǵy jyldyń 9 aıynda 7 paızyǵa artqanyn tilge tıek etti. «Bul - jaqsy kórsetkish. Bizdiń eńbegimiz zaıa ketpedi degen sóz», - dedi V.Pýtın.
