Reseı men Qyrǵyzstanda kúıdirgi boıynsha epıdemıologııalyq jaǵdaı ýshyǵyp tur, Qazaqstanda ázirge syrqattar tirkelgen joq - J. Bekshın
ASTANA. 19 qyrkúıek. QazAqparat - 2012 jyly elimizde turǵyndardyń kúıdirgimen syrqattanýynyń eshbir jaǵdaıy tirkelgen joq.
Bul týraly Qazaqstan Respýblıkasynyń Bas memlekettik sanıtarlyq dárigeri Jandarbek Bekshın málimdedi.
Onyń aıtýynsha, shekaralyq óńirlerde syrqattanýshylyq oqıǵalary tirkelýde. Mysaly, Reseıdiń Altaı óńirinde kúıdirgige shaldyqty degen kúdikpen 13 adam tirkeldi. Qyrǵyzstanda kúıdirginiń órshýi baıqalady, osylaısha sońǵy aıda aýrýǵa kúdikti 9 adam aýrýhanaǵa jatqyzylǵan.
Qazaqstanda 1948 jyldan bastap qazirgi ýaqytqa deıin kúıdirgi boıynsha statsıonarlyq-qolaısyz 1767 pýnkt tirkelgen, olarǵa turaqty bakterıologııalyq monıtorıng júrgiziledi.
«Jyl saıyn Qazaqstannyń sanıtarııalyq-epıdemıologııalyq jáne veterınarııalyq qyzmetteri adamdardyń jáne maldyń kúıdirgini juqtyrýynyń aldyn alý boıynsha josparly sanıtarııalyq-epıdemııalyq jáne veterınarııalyq-sanıtarııalyq is-sharalardy júrgizedi», - deıdi J. Bekshın.
Osyǵan baılanysty Qazaqstan Respýblıkasynyń sanıtarııalyq-epıdemıologııalyq jáne veterınarııalyq qyzmetteri kúıdirgi boıynsha statsıonarlyq-qolaısyz pýnktterde jáne kúıdirgi boıynsha qaýip tóndiretin aýmaqtarda epıdemııalyq jáne epızootııalyq oshaqtarǵa, ishki saýda obektileriniń veterınarııalyq-sanıtarııalyq jaǵdaıyna, maldan alynǵan shıkizat pen ónimderdi daıyndaý, saqtaý jáne óńdeýge, mal qorymyna, mal aıdaıtyn joldarǵa, mal sharýashylyǵy obektilerine baqylaýdy kúsheıtti, aýyl sharýashylyǵy maldaryn profılaktıkalyq vaktsınatsııalaý, sanıtarııalyq-aǵartý jumysyn júrgizýde.
Qazaqstan Respýblıkasynyń sanıtarııalyq-epıdemıologııalyq qyzmeti turǵyndarǵa belgilenbegen saýda oryndarynda et satyp almaýdy usynady.
Kúıdirgi - bezgekpen, lımfalyq apparattyń zaqymdanýymen, ýlanýmen sıpattalatyn jiti ınfektsııalyq aýrý. Teri, keı kezde ishek, ókpe jáne septıkalyq túrde ótedi. Infektsııa kózi - úı janýarlary (iri qara, qoı-eshki, túıe, shoshqa). Adamnyń juqtyrýy kóbine janasý jolymen (maldyń tutas etin bólgende, terisin óńdegende) jáne tamaqqa sporalarmen lastanǵan ónimderdi paıdalanǵanda, sondaı-aq sý, topyraq, teri buıymdary jáne zaqymdanǵan basqa da materıaldar arqyly júzege asady. Adamnan adamǵa juǵý tirkelgen joq. Topyraqtaǵy ınfektsııanyń sporalary 100 jylǵa deıin saqtalýy múmkin.
