Reseı men Qyrǵyzstan basshylary yqpaldastyqty nyǵaıtýǵa kelisti
BІShKEK. QazAqparat - Reseı men Qyrǵyzstan 2020 jyldy ózara yntymaqtastyq jyly dep jarııalady. Bul kelisimdi RF jáne QR prezıdentteri Vladımır Pýtın men Sooronbaı Jeenbekov búgin Bishkekte rásimdedi, dep habarlaıdy «QazAqparat» HAA menshikti tilshisi. Reseı kóshbasshysy Qyrǵyzstanǵa memlekettik issaparmen keldi.
Jeenbekovtyń aıtýynsha, aldaǵy jyly eki elde memleketter arasyndaǵy strategııalyq seriktestiktiń barlyq baǵyttary boıynsha birqatar sharalar ótkiziledi.
«Biz saıası, saýda-ekonomıkalyq jáne áskerı-tehnıkalyq baılanystarymyzdy nyǵaıtýǵa nıettimiz. Odaqtastyq baılanys aıasynda aımaqtaǵy qaýipsizdikti qamtamasyz etýge birlesip áreket etemiz», - dedi Pýtınmen kelissózder sońynda Qyrǵyzstan prezıdenti. - «Biz sondaı-aq, halyqaralyq mańyzdy máseleler jóninde pikir almastyq. Ózara yqpaldastyǵymyzdy, sonyń ishinde UQShU jáne ShYU syndy aımaqtyq uıymdar arasyndaǵy baılanysymyzdy talqyladyq. Bıylǵy jyly Qyrǵyzstan bul uıymdarǵa tóraǵalyq etedi. Biz Bishkekte memleket basshylarynyń otyrysyn ótkizemiz».
Óz kezeginde Vladımır Pýtın Qyrǵyzstannyń Reseıdiń strategııalyq seriktesi jáne senimdi odaqtasy ekenin atap ótti.
«Bizdi ýaqyt synynan ótken dostyq baılanys pen ózara yntymaqtastyq baılanystyrady. Kelissózder barysynda aldaǵy ýaqyttaǵy saıası, mádenı, gýmanıtarlyq jáne basqa da salalardaǵy ózara baılanysty jan-jaqty nyǵaıtýǵa ózara qyzyǵýshylyq atap ótildi», - dedi ol.
Taraptar sondaı-aq Eýrazııalyq ekonomıkalyq odaqqa múshelik aıasyndaǵy saýda-ekonomıkalyq baılanysty tereńdetý jaıyn talqylady.
Eki el arasyndaǵy ózara saýda aınalymy ótken jyldyń ózinde 2 mıllıard dollardy quraǵan. Reseılik kásiporyndar qyrǵyz ekonomıkasynyń barlyq salasyn derlik qamtıdy. Qyrǵyzstan Respýblıkasynda reseı-qyrǵyz birlesken 700 kásiporny jumys isteıdi.
Reseı Federatsııasy men Qyrǵyz Respýblıkasy tabıǵı resýrstardy ıgerý salasyndaǵy yntymaqtastyqty da damytýǵa nıetti.
Bilim salasyna kelsek, qazirgi ýaqytta Reseıde 16 myńǵa jýyq qyrǵystandyq stýdent, olardyń 6,5 myńy Reseı bıýdjetinen bilim alýda.
Eki eldiń yntymaqtastyǵy áskerı-tehnıkalyq seriktestik sheńberinde óte aýqymdy.
«Qyrǵyzstandaǵy reseılik áskerı baza respýblıkanyń qorǵanys qabiletin nyǵaıtýǵa eleýli úles qosyp otyr, onyń qatysýy Ortalyq Azııadaǵy qaýipsizdik pen turaqtylyqtyń mańyzdy faktory bolyp tabylady», - dedi Reseı prezıdenti.
Avtory Natalıa Gılt
