Reseı men Qytaı jańa atom elektr stantsııalaryn birlesip salý máselesin qarastyrady
ASTANA. KAZINFORM — Reseı men Qytaı úkimet basshylarynyń 30-shy kezekti kezdesýiniń qorytyndysy boıynsha taraptar jańa atom elektr stantsııalaryn birlesip salý máselesin zertteýge kelisti, dep habarlaıdy Reseı úkimetiniń saıty.
Qorytyndy kommıýnıkede Máskeý men Beıjiń «Tıanvan» jáne «Sıýıdapý» AES qurylys jobalaryn iske asyrýdy jalǵastyrýǵa, qurylys jumystarynyń ýaqtyly aıaqtalýyn jáne nysandardy paıdalanýǵa berýdi qamtamasyz etýge kelisimderin rastady.
— Osy negizde (taraptar) ıadrolyq energııany beıbit maqsatta paıdalaný salasyndaǵy yntymaqtastyqty tereńdetýge, termoıadrolyq sıntez, jyldam neıtrondy reaktorlar jáne jabyq ıadrolyq otyn tsıkli salalaryndaǵy yntymaqtastyqty dáıekti túrde ilgeriletýge jáne ózara tıimdilik pen múddeler teńgerimi qaǵıdattaryna negizdelgen ıadrolyq otyn tsıkliniń bastapqy kezeńi men jańa atom elektr stantsııalaryn birlesip salý salasynda pakettik kelisimder túrinde yntymaqtastyqty damytýǵa nıetti, — delingen qujatta.
Eske sala ketsek, Reseı men Qytaı úkimet basshylarynyń otyzynshy kezekti kezdesýi 2025 jyldyń 3 qarashasynda Qytaıdyń Hanchjoý qalasynda ótti. Kezdesý qorytyndysy boıynsha 15 qujatqa qol qoıyldy.
Buǵan deıin Ózbekstanda atom elektr stantsııasy qurylysynyń birinshi kezeńi bastalǵanyn jazǵan edik.