Reseı jáne Qytaı Marsty birlesip zertteıdi
MÁSKEÝ. KAZINFORM — Reseı men Qytaı Marsty zertteýge arnalǵan birlesken mıssııa aıasynda ǵylymı aspaptar men tehnıkany ázirleıdi. Bul týraly agenttiktiń Máskeýdegi menshikti tilshisi habarlaıdy.
Bul týraly «Roskosmos» memlekettik korporatsııasynyń bas dırektory Dmıtrıı Bakanov málimdedi.
— Bizde «Chane-7» birlesken Aı mıssııasy bar. Sondaı-aq Marsty zertteýge arnalǵan birlesken mıssııany bastaımyz. Onyń aıasynda ǵylymı aspaptar men tehnıka ázirlenedi, — dedi «Roskosmos» bas dırektory Dmıtrıı Bakanov.
Onyń aıtýynsha, bul joba Reseı men Qytaıdyń ǵarysh salasyndaǵy yntymaqtastyǵynyń negizgi baǵyttarynyń biri bolady.
Reseı men Qytaı ǵarysh salasynda birqatar iri jobany birlesip júzege asyryp keledi. Yntymaqtastyqtyń basym baǵyttarynyń biri — Halyqaralyq ǵylymı Aı stantsııasy (HǴAS) jobasy. Oǵan 16 el men eki halyqaralyq uıym qatysady.
Buǵan deıin Qytaıdyń aýqymdy ǵaryshtyq mıssııalardy júzege asyrýdy josparlap otyrǵanyn habarlanǵanbyz.
Sondaı-aq qytaılyq ǵalymdar Mars jaǵdaıynda tirshilik ete alatyn ósimdik túrin tapqany týraly jazǵan edik.
