Reseı men KHDR shekarada jańa avtomobıl kópiri arqyly qozǵalysty ashty
MÁSKEÝ.KAZINFORM - Reseı men KHDR Týmannaıa ózeni arqyly ótetin, Reseıdiń Prımore ólkesi men Soltústik Koreıa aýmaǵyn jalǵaıtyn jańa kópir arqyly avtomobıl qozǵalysyn ashty, dep habarlaıdy agenttik tilshisi.
Kópir eki el arasyndaǵy alǵashqy avtomobıl ótkeli boldy. Ol 1959 jyldan beri Reseı men KHDR-dy baılanystyryp turǵan qoldanystaǵy Dostyq kópiri temirjol ótkeliniń janynda salynǵan.
Kópirdiń ashylýymen qatar «Hasan» ótkizý pýnktiniń qurylysy aıaqtaldy. Buǵan deıin habarlanǵandaı, nysan on qozǵalys jolaǵyna eseptelgen, onyń ótkizý qabileti táýligine 300 kólikke deıin jetedi.
Reseı Premer-Mınıstri Mıhaıl Mıshýstın shekara mańyndaǵy kólik ınfraqurylymyn damytý Reseı men KHDR arasyndaǵy saýda-ekonomıkalyq, ǵylymı-tehnologııalyq jáne mádenı yntymaqtastyqty keńeıtýge jaǵdaı jasaıtynyn atap ótti.
Jańa avtomobıl ótkeli eki eldiń shekara mańyndaǵy aýmaqtaryn damytýǵa jáne olardyń arasyndaǵy kólik qatynasynyń kólemin arttyrýǵa yqpal etýge tıis.
Kópirdiń qurylysy 2025 jylǵy sáýirde Reseı Prezıdenti Vladımır Pýtınniń 2024 jyly KHDR-ǵa sapary barysynda qol jetkizilgen ýaǵdalastyqtan keıin bastaldy.
Buǵan deıin Reseıdiń Soltústik Koreıamen jańa kópirler salýdy josparlap otyrǵany habarlanǵan bolatyn. Vladımır Pýtın Shyǵys ekonomıkalyq forýmynda sóılegen sózinde Týmannaıa ózeni arqyly ótetin kópir 2026 jyly ashylatynyn málimdegen edi.
