Reseı men Qazaqstandaǵy benzın baǵasyn salystyrý múldem qate túsinik - senator
ASTANA. QazAqparat - Senat depýtaty Sársenbaı Eńsegenov Qazaqstandaǵy benzın qunyn Reseıdegi baǵaǵa jetkizý saldary áleýmettik máseleni týdyrýy múmkin ekenin málim etti, dep habarlaıdy QazAqparat.
«Aldaǵy ýaqytta bizdiń munaı óńdeýshi kompanııalar tabys tabý maqsatynda benzındi shetelge shyǵarýy múmkindigi bar, sebebi otynnyń naryqtyq baǵasy joǵary. Osy turǵydan qarastyrsaq, bizdiń ishki naryǵymyzdy janar-jaǵarmaımen qamtamasyz etýdiń tıimdi tetikterin eskerý kerek. Ekinshiden, bul munaı óńdeý kompanııalarynyń otyndy shetelge satý arqyly túsetin tabysyn elimizdegi ishki naryqtan túsetin tabysymen baılanystyrmaý qajet. Óıtkeni bul naryqtar ózara baılanysta bolsa, onda elimizde otyn baǵasy qymbattaýy yqtımal», - dedi depýtat Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda.
Sonymen qatar, senator Qazaqstanda benzın qunyn Reseıdegi baǵaǵa jetkizýge bolmaıtynyn atap ótti.
«Reseı men Qazaqstandaǵy janar-jaǵarmaıdyń baǵasyn salystyrý múldem qate bolar edi. Sebebi, RF-tegi eńbekaqy mólsheri bizge qaraǵanda joǵary, sondaı-aq zeınetaqy deńgeıi de joǵarylaý. Osy oraıda Reseıdegi benzın baǵasyna elikteý nemese sol baǵaǵa jetkizýge talpyný áleýmettik salada másele týdyrýy múmkin», - dedi Sársenbaı Eńsegenov.
Budan buryn habarlanǵandaı, QR Energetıka vıtse-mınıstri Bolat Aqsholaqov RF-pen salystyrǵanda elimizde benzın men dızel otynynyń baǵasy arzandaý ekenin aıtqan bolatyn.
Aıta keteıik, búgin komıtettiń keńeıtilgen otyrysynda «2010 jylǵy 9 jeltoqsandaǵy QR Ykimeti men RF Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizý týraly hattamany ratıfıkatsııalaý týraly» zań jobasy qaraldy.
