Reseı men Qazaqstan arasyndaǵy strategııalyq seriktestik senimdi damyp keledi – Vladımır Pýtın
Reseı men Qazaqstan arasyndaǵy strategııalyq seriktestik pen odaqtastyq qatynastar senimdi túrde ári tabysty damyp keledi. Bul týraly Aqordada Memleket basshysy Qasym-Jomart Toqaevpen shaǵyn quramdaǵy kelissóz barysynda Reseı Federatsııasynyń Prezıdenti Vladımır Pýtın aıtty, dep habarlaıdy Kazinform.
«Elderimiz arasyndaǵy strategııalyq seriktestik pen odaqtastyq qatynastar senimdi túrde ári tabysty damyp keledi. Ony, álbette, tsıfrlar áıgilep tur. Biz jańa ǵana XIX Óńiraralyq yntymaqtastyq forýmynyń plenarlyq otyrysyna qatystyq. Bul – óte jaqsy format. Adamdar bir-birimen tikeleı qarym-qatynas jasap, jumys isteıdi, aralasady ári bul árdaıym eleýli nátıje beredi. Osy joly da solaı bolaryna senimdimin. Buǵan qosa óte mańyzdy taqyryp tańdalyp otyr. Azyq-túlik – kez kelgen qoǵamnyń, memlekettiń tynys-tirshiliginiń negizi. Elderimizdiń áleýeti zor. Óz qajettilikterimizdi ǵana qamtamasyz etip qana qoımaı, jahandyq naryqtardaǵy kóptegen seriktesterimizge de kómektesýge múmkindigimiz bar. Másele yntymaqtastyǵymyzdyń barlyq artyqshylyǵyn paıdalanyp, keleshekte osy múmkindikterdi arttyrýda ǵana bolyp tur. Arǵy kúni Reseı men Qazaqstan arasynda HHІ ǵasyrdaǵy tatý kórshilik jáne odaqtastyq týraly shartqa qol qoıylǵanyna 10 jyl tolady. Bul bizdiń kópjaqty dostyq qarym-qatynasymyzdy damytýdyń berik negizine aınaldy», – dedi Vladımır Pýtın.
Reseı Prezıdenti eki memlekettiń halyqaralyq arenadaǵy konstrýktıvti yqpaldastyǵyn, EAEO, UQShU, TMD, BUU jáne ShYU aıasyndaǵy úılesimdi qarym-qatynasyn joǵary baǵalady. Sondaı-aq ol 2024 jyly Reseıdiń BRIKS pen TMD-ǵa, al Qazaqstannyń UQShU-ǵa tóraǵalyǵy sheńberinde ózara qoldaý kórsetýge daıyn ekenin rastady.
