Reseı men EO arasyndaǵy saýda 2025 jyly tarıhı mınımýmǵa tústi

ASTANA. KAZINFORM – Eýropalyq odaq pen Reseı arasyndaǵy saýda kólemi 2025 jyldyń ekinshi toqsanynda 2002 jyldan bergi eń tómengi deńgeıge jetti. Bul týraly Euronews Evrostat derekterine súıene otyryp habarlady.

2022 jylǵy aqpanda Ýkraınaǵa basqynshylyqtan keıin EO Reseıge qarsy birqatar qatań shekteýler engizdi. Sonyń saldarynan 2022 jyldyń birinshi toqsanynan 2025 jyldyń ekinshi toqsanyna deıin Reseıden EO-ǵa ımport 89%-ǵa, al EO-dan Reseıge eksport 61%-ǵa qysqardy.

2025 jyldyń ekinshi toqsanynda Reseıden ımport kólemi 7 mlrd eýrony qurady, al eksport – 7,5 mlrd eýroǵa jetti. Osylaısha saýda balansy tarıhta alǵash ret profıtsıtke shyǵyp, 0,5 mlrd eýro boldy.

Jalpy saýda aınalymy 14,5 mlrd eýroǵa teń boldy. Bul 2022 jyldyń basyndaǵy 81,9 mlrd eýro kólemimen salystyrǵanda 82%-ǵa az.

EO-nyń Reseımen saýda qurylymynda negizgi úles burynǵysynsha energııa tasymaldaýshylarǵa tıesili. 2022 jyly energııa baǵasynyń ósýi saýda balansynyń tapshylyǵyn 42,8 mlrd eýroǵa deıin ulǵaıtqan bolatyn. Alaıda 2025 jyldyń ekinshi toqsanyna qaraı sanktsııalar men baǵalardyń tómendeýi nátıjesinde bul kórsetkish 4,2 mlrd eýroǵa deıin qysqardy.

Sonymen qatar Reseıdiń EO-dan tys eldermen jalpy saýdadaǵy úlesi de aıtarlyqtaı azaıdy. 2022 jyldyń birinshi toqsanynda Reseı EO-nyń eksportyndaǵy úlesi 3,2% bolsa, 2025 jyldyń ekinshi toqsanynda ol 1,2%-ǵa deıin tómendedi. Importtaǵy úlesi 9,3%-dan 1,1%-ǵa deıin azaıyp, 88%-ǵa qysqardy.

Eýroodaqtyń energetıkalyq táýeldiligin azaıtýdaǵy qadamdary da nátıjesin berdi. 2021 jyldyń basynda Reseı EO-nyń negizgi munaı jetkizýshisi bolsa, 2025 jyldyń ekinshi toqsanynda onyń úlesi nebári 2%-ǵa tústi. Osy kezeńde AQSh pen Norvegııadan ımport aıtarlyqtaı artty. Gaz jetkiziliminde Reseıdiń úlesi 39%-dan 13%-ǵa deıin, nıkelde – 41%-dan 15%-ǵa deıin, al temir men bolatta – 18%-dan 6%-ǵa deıin tómendedi.

Aıta keteıik, Iran men «eýropalyq úshtik» arasyndaǵy kelissózder sanktsııalyq qaýipterge baılanysty tyǵyryqqa tireldi.