Reseı men Ázerbaıjan AZAL ushaǵy apatyna baılanysty máseleni rettedi
ASTANA. KAZINFORM – Búgin, 15 sáýirde Ázerbaıjan Syrtqy ister mınıstrliginiń saıtynda Reseı Federatsııasy Syrtqy ister mınıstrligi men Ázerbaıjan Respýblıkasy Syrtqy ister mınıstrliginiń birlesken málimdemesi jarııalandy.
- Reseı Federatsııasy men Ázerbaıjan Respýblıkasy prezıdentteriniń 2025 jyldyń 9 qazanynda Dýshanbede ótken kezdesýi barysynda qol jetkizgen kelisimderge sáıkes, taraptar 2024 jyldyń 25 jeltoqsanynda Aqtaý qalasy mańynda AZAL kompanııasyna tıesili Embraer 190 ushaǵynyń Reseı Federatsııasynyń áýe keńistigindegi áýe qorǵanys júıesiniń abaısyz áreketi saldarynan apatqa ushyraýynyń saldaryn, sonyń ishinde ótemaqy tóleý máselesin tıisti túrde rettedi. Qabyldanǵan qadamdar odaqtas ózara is-qımyl aıasynda ózara tıimdi yntymaqtastyqty odan ári damytýǵa degen ortaq mindettememizdi rastap otyr. Biz Reseı-Ázerbaıjan qarym-qatynasynyń ózara qurmet, senim jáne eki taraptyń múddelerin eskerýge negizdelgen údemeli damýy tatý kórshilik qarym-qatynastardy nyǵaıta beretinine jáne eki el halyqtarynyń múddesi úshin yntymaqtastyqty keńeıtetinine senim bildiremiz, - delingen Ázerbaıjan SІM málimdemesinde.
Vedomstvo qaza tapqandardyń otbasylaryna kóńil aıtty.
- Biz ushaq apatynda qaza tapqandardyń otbasylary men dostaryna taǵy qaıǵyryp kóńil aıtamyz jáne osy qaıǵyly oqıǵadan zardap shekken barsha janmen osy orny tolmas qaıǵyny bólisemiz, - dep qosty mınıstrlik.
Eske sala ketsek, 2025 jylǵy 25 jeltoqsanda Bakýden Groznyıǵa bet alǵan Ázerbaıjan áýe joldarynyń ushaǵy Aqtaý mańynda apatqa ushyrady. Bortta 67 adam bolǵan, onyń 29-y aýrýhanaǵa jatqyzyldy.
