Reseı men AQSh qarym-qatynasynyń nasharlaýy alańdatady - QR Prezıdenti

VAShINGTON. QazAqparat - Qazaqstandy Reseı men AQSh qarym-qatynasynyń nasharlaýy alańdatady. Bul týraly búgin Aq úıde Amerıka Qurama Shtattarynyń Prezıdenti Donald Tramp ekeýara kezdesýden keıin birlesken málimdeme jasaý barysynda Qazaqstan Prezıdenti Nursultan Nazarbaev aıtty, dep habarlaıdy QazAqparat.

«Qazaqstan 2001 jyly terrorızmge qarsy kúreste AQSh-qa belsendi qoldaý kórsetti jáne qazirgi ýaqytta da Aýǵanstanda júrgizilip jatqan aýqymdy jumystarǵa kómek kórsetip otyr. Aýǵanstanda amerıkalyq áskerdiń bolýy bul tek qana AQSh-tyń isi emes. Sonymen birge búkil álem terrorızmniń jańa oshaqtaryna qarsy turýy tıis. Bul Aýǵanstannyń kórshisi - bizdiń barlyǵymyzdyń mindetimiz. Qazaqstan osy jyldardyń ishinde 75 mln dollar gýmanıtarlyq jáne tehnıkalyq kómek kórsetti. Buǵan qosa myń aýǵandyq jas ózderinde joq mamandyqtardy bizde oqýda. Oǵan 50 mln dollar jumsaldy», - dedi Elbasy.

Qazaqstan Prezıdenti Donald Tramppen kezdesý barysynda birqatar jahandyq máseleler, onyń ishinde Soltústik Koreıadaǵy jaǵdaıdy turaqtandyrý jaıy talqylanǵanyn aıtty.

«Ózińiz biletindeı, Qazaqstan álemde kólemi jóninen 4-oryn alatyn ıadrolyq arsenaldan bas tartyp, Semeıdegi synaq alańyn japty. Osy oraıda, basqa da ıadrolyq qarýy bar elderge bizden úlgi alýǵa shaqyrýǵa moraldyq quqyǵymyz bar. Mundaı áńgimeni Iranmen júrgizdik, qazir Soltústik Koreıamen kelissóz júrgize alamyz. KHDR máselesin Qytaı, AQSh, Reseı tarapy birlese sheshe alady. Sondyqtan, kórshi el retinde Reseı men AQSh arasyndaǵy qarym-qatynastyń nasharlap ketýi bizdi alańdatady», - dedi Nursultan Nazarbaev.

Foto: Aqordanyń baspasóz qyzmeti