Reseı men AQSh arasyndaǵy Er-Rııadtaǵy kelissózge kimder qatysady
ASTANA. KAZINFORM – Búgin Reseı men AQSh delegatsııalary Ýkraınadaǵy qaqtyǵysty retteý boıynsha kelissóz júrgizedi, dep habarlaıdy TASS aqparat agenttigi.
Reseı delegatsııasyn Federatsııa Keńesiniń halyqaralyq ister jónindegi komıtetiniń tóraǵasy Grıgorıı Karasın men Federaldyq qaýipsizdik qyzmeti dırektorynyń keńesshisi Sergeı Beseda basqarady.
Al AQSh delegatsııasynyń quramynda Memlekettik departamenttiń saıası josparlaý jónindegi dırektory Maıkl Enton, sondaı-aq Ýkraına boıynsha arnaıy elshi Kıt Kellog pen Ulttyq qaýipsizdik jónindegi keńesshi Maık Ýoltstyń kómekshileri bolady dep kútilip otyr.
Reseı prezıdentiniń kómekshisi ıÝrıı Ýshakovtyń aıtýynsha, konsýltatsııalardyń taqyryby Qara teńizdegi astyq óndirý bastamasyn qaıta jandandyrý bolmaq. Mundaı kelisimderge Reseı men AQSh prezıdentteri Vladımır Pýtın men Donald Tramptyń telefon arqyly sóılesýi kezinde qol jetkizildi.
AQSh prezıdentiniń ulttyq qaýipsizdik jónindegi keńesshisi delegatsııalar Qara teńizdegi soǵys qımyldaryn toqtatý máselesine nazar aýdaratynyn rastady. Ol sondaı-aq Reseı men AQSh kelissózderdiń kelesi kezeńinde atysty toqtatý, bitimgershilik kontıngentin tekserý, aýmaqtarǵa ıelik etý máselelerin talqylaıtynyn atap ótti.
Kelissózden bir kún buryn AQSh prezıdentiniń arnaıy ókili Stıven Ýıtkoff AQSh Saýd Arabııasynda «naqty progreske» qol jetkizedi dep kútetinin málimdedi.
— Saýd Arabııasynda atap aıtqanda Qara teńizdegi atysty toqtatý máselesinde naqty ilgerileý baıqalady dep oılaımyn. Osydan keıin, árıne, tolyq atysty toqtatýǵa qaraı qozǵalys bolady, - dedi ol Fox News-ke bergen suhbatynda.
Buǵan deıin Er-Rııadta AQSh pen Ýkraına delegatsııalarynyń kelissózi aıaqtalǵanyn jazǵan edik.