Reseı Memlekettik Dýmasy mıgranttar úshin baj salyǵyn kóterý týraly zań jobasyn qaraıdy
ASTANA. KAZINFORM – Reseı parlamenti tómengi palatasynyń tóraǵasy Vıacheslav Volodın áleýmettik jelidegi arnasynda kóshi-qon saıasatyn odan ári jetildirýge baǵyttalǵan zań jobasyn qaraýǵa kirisetinderin habarlady. Bul týraly Kazinform tilshisi málimdeıdi.
Mıgranttar úshin salyqty kóterýdiń usynystary, onyń ishinde:
• Reseı azamattyǵyn resimdeý kezinde – 12 esege, ıaǵnı 4200 rýblden 50 000 rýblge deıin;
• ýaqytsha turýǵa ruqsatty resimdeý kezinde – 8 esege, ıaǵnı 1920 rýblden 15 000 rýblge deıin;
• turýǵa ruqsatty resimdeý kezinde – 5 esege, ıaǵnı 6000 rýblden 30 000 rýblge deıin.
Mıgranttardy jumysqa tartýǵa ruqsat berý úshin baj salyǵyn árbir sheteldik maman úshin 15 000 rýblge deıin arttyrý josparlanýda.
Onyń sózinshe, munyń bári kóshi-qon salasynda tártip ornatýǵa, sondaı-aq bıýdjetke qosymsha kiris ákelýge yqpal etedi, ol boljam boıynsha jylyna 15 mlrd rýbldi (6,63 baǵamy boıynsha 99 mlrd 450 mln teńgeni) quraıdy.
Sondaı-aq, Memlekettik Dýmanyń qaraýynda kóshi-qon máselelerin retteıtin 10 zańnamalyq bastama bar ekenin atap ótti. 2024 jyldan bastap osy bólikte 22 federaldy zań qabyldanǵan.
Quqyqtyq baza qalyptastyrylǵan. RF-da turyp, onyń azamaty bolǵysy keletinder: orys tilin bilýi, RF zańdaryn saqtaýy, onyń dástúrlerin, tarıhy men mádenıetin qurmetteýi kerek.
Buǵan deıin 2026 jyly Qazaqstanda qansha sheteldik jumys isteı alatyny týraly jazǵan bolatynbyz.
