Reseı Memlekettik Dýmasyna depýtattardy saılaý nátıjesi jarııalandy
ASTANA. QazAqparat - 18 qyrkúıektegi saılaý qorytyndysy boıynsha, jetinshi shaqyrylymdaǵy Reseı Memlekettik Dýmasyna: «Birtutas Reseı» - 343, Reseı Federatsııasynyń Kommýnıstik partııasy - 42, Reseıdiń lıberaldyq-demokratııalyq partııasy - 39, «Ádiletti Reseı» - 23 mandatqa ıe boldy.
RF Ortalyq saılaý komıssııasynyń qorytyndy málimetteri osyndaı, dep habarlady TASS.
Osylaısha, «Birtutas Reseı» tómengi palatada konstıtýtsııalyq basymdyqqa ıe boldy. Tizim boıynsha partııa Memlekettik Dýmada 140 oryn jáne bir mandatty okrýgter boıynsha 203 oryn alyp otyr.
"Otan" partııasynyń ókili Alekseı Jýravlev, "Azamattyq platforma" federaldyq saıası komıtetiniń basshysy Rıfat Shaıhýtdınov jáne altynshy shaqyrylymda "Birtutas Reseı" fraktsııasynda bolǵan jáne bul joly ózin-ózi usynǵan kandıdat Vladıslav Reznık birmandattyq okrýgterde jeńiske jetti.
Memlekettik Dýma saılaýyna elektorattyń qatysý úlesi 47,88% qurady.
