Reseı ІІM: alaıaqtar ózderin atqarýshy organdardyń basshylary bolyp tanystyrady

MÁSKEÝ. KAZINFORM – Reseıde alaıaqtardyń WhatsApp pen Telegram messendjerlerinde jalǵan akkaýnttar ashyp, ózderin óńir basshylary, aımaqtyq zań shyǵarýshy jáne atqarýshy bılik organdarynyń ókilderi, sondaı-aq jergilikti ózin-ózi basqarý organdarynyń jetekshileri retinde kórsetý oqıǵalary jıilegen, dep habarlaıdy Kazinform agenttiginiń tilshisi.

RF ІІM Aqparattyq-kommýnıkatsııalyq tehnologııalardy zańsyz paıdalanýǵa qarsy is-qımyldy uıymdastyrý basqarmasynyń Telegram-arnasynda jarııa etilgen málimetinshe, bul tulǵalardyń atynan azamattarǵa habarlama jiberiledi. Keıde «senimdilik» úshin dıpfeık tehnologııalaryn qoldanyp, qysqa beıneqońyraýdy paıdalanady jáne ótirigin jasyrý úshin «baılanys sapasynyń nasharlyǵyn» syltaýratady.

Sonymen qatar, keıin qaskóıler azamatqa quqyq qorǵaý organdarymen mańyzdy áńgime bolatynyn eskertedi. Osydan keıin qupııalylyqty tekserý jáne zańsyz uıymdardy qarjylandyrý faktilerin anyqtaý syltaýymen azamatqa psıhologııalyq qysym kórsetilip, ony alaıaqtarǵa aqsha berýge májbúrleý kózdeledi.

Eske sala keteıik, buǵan deıin Reseıde alaıaqtyqtyń jańa túri paıda bolǵany habarlanǵan edi.