Reseı Qyrǵyzstannyń ýaqytsha úkimetin qoldaýǵa qarjy bóledi
BІShKEK. Sáýirdiń 12-si. QazAqparat /Evgenıı Novıkov/ - Qyrǵyzdyq «Kabar» aqparattyq agenttiginde ótken baspasóz máslıhatynda Qyrǵystannyń ýaqytsha halyqtyq úkimeti (ÝHÚ) tóraǵasynyń birinshi orynbasary Almazbek Atambaev Reseıge saparynyń qorytyndylary týraly áńgimelep berdi.
Máselen, sapary barysynda A. Atambaev Reseı úkimetiniń basshylarymen jáne múshelerimen kezdesip, Qyrǵyzstanda oryn alǵan jaǵdaılarǵa túsinikteme bergen, sondaı-aq ÝHÚ-ge kómektesip, qoldaý kórsetýdi suraǵan.
Onyń aıtýynsha, Reseı tarabynan qaıtarýsyz aqshalaı grant beriledi, sondaı-aq eldi janar-jaǵarmaımen qamtamasyz etedi. Grant mólsheri 150 mıllıonnan astam AQSh dollaryn quraıdy dep kútilýde. «Beıbit kezde Reseı bizge 150 mıllıon dollar grant bólgen edi, men reseılik áriptesterge túsindirip, jaǵdaıdyń tótenshe ekenin, sondyqtan grant kólemi de kóbirek bolýy qajettiligin aıttym», - dedi ol.
Munan basqa A. Atambaev Máskeýde tolyqtaı qoldaý kórgenin, qoıylǵan máselelerdiń úlken túsinistikpen qabyldanǵanyn da qosa atap ótti.
Sársenbide Máskeýge ýaqytsha úkimet múshesi Temir Sarıevtyń basshylyǵymen kómek bólýdiń máselelerin naqty talqylaýǵa delegatsııa jolǵa shyqpaq.
