Reseı Qyrǵyzstannyń barlyq qaryzyn keshirdi
ASTANA. QazAqparat - Qyrǵyzstan men Reseıdiń qarjy mınıstrleri Adylbek Kasymalıev pen Anton Sılýanov Qyrǵyzstannyń RF aldyndaǵy 240 mln AQSh dollaryn quraıtyn qaryzyn keshirý týraly hattamaǵa qol qoıdy, dep jazady kabar.kg.
Qol qoıý rásimi Máskeýde Qyrǵyzstan prezıdenti Almazbek Atambaevtyń Reseı Federatsııasyna jasaǵan memlekettik sapary aıasynda júrgizildi.
Qyrǵyzstannyń Qarjy mınıstri jýrnalısterge 2012 jyldan beri Qyrǵyzstannyń Reseı aldyndaǵy qaryzy 488 mln dollardy quraǵandyǵyn aıtyp berdi.
«2013 jyly 188,9 mln dollar qaryz keshirildi. Alaıda, 300 mln dollar qaryzdy bólip óteýge kelisildi. 2016-2017 jyldary 60 mln dollar esepten shyǵaryldy. Endi, bizde 240 mln dollar qalyp tur edi jáne bul soma búgin qaryzdyq esepten shyǵaryldy», - dedi mınıstr.
Adylbek Kasymalıev habarlaǵandaı, hattama RF memlekettik dýmasy ratıfıkatsııalaǵannan keıin kúshine enedi.
