Reseı Qyrǵyzstannan áskerı bazasyn shyǵarýǵa daıyn - Pýtın
ASTANA. QazAqparat - Reseı kez kelgen ýaqytta Qyrǵyzstan aýmaǵynda ornalasqan áskerı bazasyn áketýge daıyn. Bul týraly RF prezıdenti Vladımır Pýtın Bishkekte Qyrǵyz Respýblıkasynyń basshysy Almazbek Atambaevpen kezdesýinen keıingi baspasóz máslıhatynda málim etti, dep habarlaıdy «Kabar».
Onyń atap ótýinshe, Kant qalasyndaǵy áskerı baza 1999-2000 jyldary sol kezdegi Qyrǵyzstan basshylyǵynyń ótinishi boıynsha Aýǵanstan aýmaǵynan shekara asyp kelip, lańkestik aktilerin uıymdastyrǵan sodyrlardyń áreketine tosqaýyl qoıý maqsatynda qurylǵan.
«Bul sharalar halyqaralyq terrorıstermen tıimdi kúresý úshin qabyldanǵan edi», - dep atap ótti RF prezıdenti.
Pýtınniń aıtýynsha, eger Qyrǵyzstan aldaǵy ýaqytta qarýly kúshterin nyǵaıtatyn bolsa, Reseı birden áskerı bazany shyǵarady. Sondaı-aq ol Reseı bazasy Qyrǵyzstanda qaýipsizdikti qamtamasyz etý úshin ǵana qajet ekenine toqtaldy.
Al Qyrǵyz Respýblıkasynyń Prezıdenti Almazbek Atambaevtyń aıtýynsha, búgingi kezdesýde respýblıka aýmaǵyndaǵy reseılik áskerı bazany nyǵaıtý máselesi talqylanǵan joq.
«Erekshe atap ótkim keletin jaıt, Reseı, kerisinshe, bizdiń qarýly kúshterimizdi nyǵaıtýǵa nıetti», - dedi A. Atambaev.
