Reseı koronavırýsqa shaldyqqandar sany 3 mıllıonnan asqan tórtinshi el boldy
MÁSKEÝ. TASS – QazAqparat – Reseıde koronavırýsty juqtyrýdyń rastalǵan jaǵdaılarynyń sany 3 mıllıonnan asty. Bul týraly senbi kúni jańa ınfektsııamen kúres jónindegi federaldy shtabtan málim etti. QazAqparat bul týraly TASS-qa silteme jasap habarlaıdy.
Osylaısha, Reseı koronavırýsqa shaldyqqandar sany 3 mıllıonnan asqan álemdegi tórtinshi memleket boldy. Alǵashqy úshtikte - AQSh, Úndistan jáne Brazılııa tur.
Reseıde bir táýlikte anyqtalǵan jańa jaǵdaılar sany 29 258-ge artyp, barlyǵy 3 021 964-ke jetti. Bul – el halqynyń 2 paıyzynan sál astam.
Salystyrý úshin aıta keteıik, Djons Hopkıns ýnıversıtetiniń málimetinshe, AQSh-ta pandemııa bastalǵaly turǵyndardyń 5,7% jýyǵy koronavırýs juqtyrǵan, Brazılııada shamamen - 3,5%, Úndistanda - 0,7%.
Búginde RF-da barlyǵy 2 426 439 naýqas nemese syrqattanǵandardyń 80,3% jazyldy. Bul, AQSh-qa qaraǵanda joǵary kórsetkish, biraq Brazılııa jáne Úndistanmen salystyrǵanda – tómen. Shtab aqparatyna sáıkes, osy ýaqytta em qabyldap jatqan naýqastardyń sany – 541 299. Qaýipti indetten 54 226 adam qaıtys boldy.
