Reseı koronavırýs juqtyrǵandar sany boıynsha álemde 6-orynǵa shyqty
MÁSKEÝ. TASS – QazAqparat – Reseı koronavırýs juqtyrǵandar sany boıynsha Frantsııadan ozyp, álem boıynsha altynshy orynǵa shyqty, dep habarlaıdy QazAqparat TASS agenttigine silteme jasap.
Reseıde sońǵy táýlikte koronavırýs ınfektsııasyn juqtyrǵandar 10 633 adamǵa kóbeıip, jalpy sany 134 687-ge jetti. 16 639 adam jazylyp shyqsa, 1280 adam qaıtys boldy, dep habarlady jeksenbi kúni koronavırýs ınfektsııasynyń taralýymen kúres jedel shtaby.
Sońǵy málimet boıynsha, indettiń táýliktik ósý qarqyny - 8,6%. Jańa tirkelgen jaǵdaılardyń 5 345-inde (50,3%) aýrý belgileri baıqalmaǵan.
Jańa juqtyrý jaǵdaılary 85 aımaqta tirkeldi. Onyń 5948-i - Máskeýde, 822-i - Máskeý oblysynda, 295 - Sankt-Peterbýrgta, 252 - Nıjegorod oblysynda, 238 - Mýrmanda jáne 136-y - Daǵystanda.
Táýlik ishinde 67 aımaqta 1626 adam aýrýhanadan shyǵarylyp, 58 adam qaıtys boldy.
Vırýs juqtyrǵandar sany boıynsha Máskeý kósh bastap tur. Onda 68 606 adam tirkelgen. Odan keıingi oryndarda Podmoskove (14 136), Sankt-Peterbýrg (5 029), Nıjegorod oblysy (2 695), Daǵystan (1 798), Mýrman (1694) oblystary tur.
Juqtyrǵandar sany 1000-nan asqan aımaqtarǵa Lenıngrad oblysy, Tatarstan men Bashqurtstan qosyldy. Jalpy mundaı 16 aımaq bar.
