Reseı qorǵanys mınıstrligindegi barlyq Tý-154-tiń ushýy toqtatyldy
ASTANA. QazAqparat - 25 jeltoqsan kúni bolǵan apattyń sebebi anyqtalǵanǵa deıin, barlyq Tý-154-tiń ushýy toqtatyldy, dep habarlaıdy RBK.
«RF Qorǵanys mınıstrligi Tý-154 áýe apatynyń tekseris jumystary aıaqtalǵanǵa deıin, atalmysh markaly ushaqtardyń barlyǵynyń ushýyn ýaqytsha toqtatý týraly sheshim qabyldady», - dep málim etti derekkóz. Derekkózdiń aıtýynsha, qazirgi tańda osy úlgidegi ushaqtardyń shekteýli sany qoldanysta bolǵandyqtan, bul sheshim áýe tasymalyna kedergi keltirmeıdi.
Budan buryn RF kólik mınıstri Maksım Sokolov Tý-154B-2 markaly ushaqtardyń tek Qorǵanys mınıstrligine qyzmet etip jatqandyqtan, ary qaraı qoldaný týraly sheshimdi tek osy vedomstvo qabyldaıtynyn málim etken. Onyń aıtýynsha, azamattyq avıatsııa Tý-154M markaly ushaqty paıdalanýda jáne kún tártibinde ary qaraý qoldaný týraly sheshim kún tártibinde turǵan joq.
Eske sala keteıik, 2016 jyldyń 25 jeltoqsanynda Astana ýaqyty boıynsha saǵat 08:27-de Tý-154 ushaǵy Sochıden ushqandaryna eki mınýt ótkende radardan joǵaldy. Onyń bortynda úsh telearnanyń - NTV, «Zvezda» jáne «Birinshi» arnanyń túsirý toptary bolǵan. Apatqa ushyraǵan 92 adamnyń ishinde - toǵyz jýrnalıst boldy. Olar Birinshi arnadan Dmıtrıı Rýnkov, Vadım Denısov pen Aleksandr Soıdov, NTV-dan Mıhaıl Lýjetskıı, Oleg Pestov pen Evgenıı Tolstov jáne «Zvezda» arnasynan Pavel Obýhov, Aleksandr Sýranov pen Valerıı Rjevskıı qaza tapty. Sonymen qatar, bortta áskerı qyzmetkerler, Aleksandrov atyndaǵy ansambldiń mýzykanttary, dári-dármekterdi Sırııaǵa alyp bara jatqan dáriger Elızaveta Glınka jáne Qorǵanys mınıstrligi mádenıet departamentiniń dırektory Anton Gýbankov bar edi.
