Reseı kompanııalary «Astana» qarjy ortalyǵynda jumys isteýge múddelilik tanytýda

BІShKEK. QazAqparat – Qazaqstanda «Astana» halyqaralyq qarjy ortalyǵy (AHQO) tabysty jumys istep tur. Bul týraly Bishkektegi Eýrazııalyq ekonomıkalyq forýmynyń plenarlyq otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Osy oraıda bul ortalyq óte tıimdi halyqaralyq alań bolyp tur. AHQO aǵylshyn quqyǵyna sáıkes qyzmet etip jatyr. Atap aıtqanda, reseılik jáne basqa da kompanııalar tarapynan Halyqaralyq qarjy ortalyǵynyń jumysyna joǵary qyzyǵýshylyqty baıqap otyrmyz», - dedi Qasym-Jomart Toqaev.

Memleket basshysy búgin Bishkektegi Eýrazııalyq ekonomıkalyq forýmǵa kelgenderdi «Astana» halyqaralyq qarjy ortalyǵynyń jumysymen jan-jaqty tanysýǵa shaqyrdy.

«Reseıden Qazaqstanǵa 200-den astam kásipker kelip, atalǵan qarjy ortalyǵynyń alańynda ornalasty. Osy oraıda tıisti vedomstvolardyń basshylaryna reseılik kásipkerler úshin qolaıly jaǵdaı jasaý týraly tapsyrma berdim», - dedi Qazaqstan Prezıdenti.

Buǵan deıin habarlaǵanymyzdaı, Qasym-Jomart Toqaev resmı saparmen Qyrǵyzstanǵa bardy.

Qyrǵyzstan Prezıdenti «Aq keme» mármár shatyrynda Qasym-Jomart Toqaevty resmı qarsy aldy.