Reseı Kókshetaý, Semeı jáne Óskemen jylý elektr ortalyqtaryn salady

Búgin Aqordada Qazaqstan men Reseı Energetıka mınıstrlikteri arasynda Kókshetaý, Semeı jáne Óskemen jylý elektr ortalyqtaryn salý jobalary boıynsha yntymaqtastyq jónindegi ózara túsinistik memorandýmyna qol qoıyldy, dep habarlaıdy Kazinform.

Premer-mınıstrdiń birinshi orynbasary Roman Sklıardyń BAQ ókilderine aıtýynsha, atalǵan jylý elektr ortalyqtaryn Reseı tarapy tolyǵymen salyp beretin bolady.

«Kókshetaý qalasy jylý elektr ortalyǵy jobasynyń tehnıkalyq-ekonomıkalyq negizdemesi daıyn. Osy memorandýmǵa qol qoıylǵannan keıin tıisti qurylymdar ony júzege asyrýǵa kirisedi. Jobalyq-smetalyq qujattamasy, kelisimsharttar jáne basqalary qajet. Biraq, ol taıaý ýaqytta bolady. Menińshe, kelesi jyly Kókshetaý JEO-sy salyna bastaıdy», - dedi Roman Sklıar.

Onyń atap ótýinshe, Semeı men Óskemen jylý elektr ortalyqtarynyń tehnıkalyq-ekonomıkalyq negizdemesi áli ázirlenbegen. Úsh ortalyq ta kómirmen jumys isteıtin bolady.