Reseı keskindeme óneriniń tanymal ókilderi - Astanada
ASTANA. QazAqparat - Astanada Qazaqstan Respýblıkasynyń Ulttyq mýzeıinde «Reseıdiń zamanaýı kórkemsýreti» atty kórme ashyldy.
Onda astanalyq turǵyndardyń nazaryna «Erarta» zamanaýı óner mýzeıiniń jınaǵynan Reseı sýretshileri usynǵan 60 týyndy qoıylyp otyr.
Kórmeni QR Mádenıet jáne sport mınısterligi men RF Mádenıet mınıstrliginiń qoldaýymen QR Ulttyq mýzeıi jáne «Erarta» zamanaýı óner mýzeıi birlesip ótkizip otyr.
«Reseıdiń zamanaýı kórkemsýreti» atty kórme arqyly Ulttyq mýzeı QR mádenıet saıasatynyń tujyrymdamasy aıasynda júzege asyrylatyn «Álemdik mádenıet jáne zamanaýı óner» jobasyn ashady.
«Reseıdiń zamanaýı kórkemsýreti» atty kórmege 28 sýretshiniń jumysy qoıylǵan. Olardyń arasynda Valerıı Lýkka, Anatolıı Zaslavskıı, Felıks Volosenkov, Elena Fıgýrına, Nıkolaı Sajın bastaǵan qalyptasqan tanymal tulǵalar men Vıtalıı Pýshnıtskıı, Ilıa Gaponov, Aleksandr Dashevskıı syndy jas sýretshiler bar. Kórmege Vladımır Ovchınnıkov, Vladlen Gavrılchık, Anatolıı Basın sekildi lenıngradttyq sýretshilerdiń týyndylary engizilgen. Munda Reseıdiń ózekti ónerin tanytyp júrgen aımaqtyq sýretshiler krasnodarlyq Vladımır Mıgachevtiń, novosibirlik Maksım Kaetkın men Vladımır Fateevtiń, lıpetskilik ıÝrıı Tatıanınniń de sýretteri usynylǵan.
Erarta mýzeıiniń kýratory Vladımır Nazanskııdiń oılastyrýy boıynsha, kórme ekspozıtsııasy shartty túrde mynadaı bólimderge bólingen: «Identıfıkatsııa», «Ekspressıonızm», «Jańa baıyptylyq», «Múltiksiz keskindeme». Alaıda barlyq kórkemsýretter usynylǵan qurylymmen sáıkes kele barmeıdi. Sebebi olar jeke dara vızýaldy tájirıbeni kórsetedi.
«Erarta» zamanaýı óner mýzeıiniń negizi 2010 jyly qalanǵan. Ol Reseıdiń memlekettik emes iri mýzeıleriniń biri bolyp tabylady. Onyń qorynda Reseı men oǵan jaqyn shet memleketterdegi sýretshilerdiń 2300 jumysy bar. Mýzeı kollektsııasynyń negizin Lenıngrad-Peterbýrg keskindeme jáne monýmentaldy óner mektebine qarasty Sankt-Peterbýrg cýretshileriniń jumysy quraıdy.
«Reseıdiń zamanaýı kórkemsýreti» atty kórme mýzeıge kelýshilerdi Reseıdiń zamanaýı keskindeme óneriniń jarqyn ókilderimen tanystyrmaq. Kórme 29 naýryzǵa deıin jalǵasady.
