Reseı Qazaqstannan benzın suraǵan joq – Energetıka mınıstrligi
ASTANA. KAZINFORM – Energetıka mınıstri Erlan Aqkenjenov Reseı tarapy eldegi janarmaı tapshylyǵyna baılanysty Qazaqstannan benzın jetkizýdi surady degen aqparatty joqqa shyǵardy.
- Reseı Federatsııasynan resmı suranys bolǵan joq, - dedi Energetıka mınıstri Parlament palatalarynyń birlesken otyrysy aıasynda.
Osy rette ol Qazaqstan reseılik tarapynan benzınge resmı suranys kelip túsken jaǵdaıda Energetıka mınıstrligi ony qarastyrýǵa daıyn ekendigin jasyrǵan joq.
Esterińizge sala ketsek, 24 maýsymda Reuters agenttigi derekkózderge silteme jasaı otyryp, Reseı Qazaqstanmen shamamen 50 myń tonna AI-92 markaly benzındi ımporttaý týraly kelissóz júrgizip jatqanyn habarlady. Kórshi el mundaı qadamǵa munaı óńdeý zaýyttaryndaǵy jumystyń irkilisine baılanysty eldiń ishki naryǵynda oryn alǵan tapshylyqtyń ornyn toltyrý úshin baryp otyr-mys.
Buǵan deıin polıtsııa keıingi eki aıda 17 tonna janar-jaǵarmaıdyń zańsyz shyǵarylýyna tosqaýyl qoıǵanyn jazǵan edik.
