Reseı Qazaqstannan balmuzdaq ákelýge ýaqytsha shekteý qoıdy
MÁSKEÝ.KAZINFORM - Reseıdiń Aýyl sharýashylyǵy ónimderin veterınarııalyq jáne fıtosanıtarııalyq baqylaý jónindegi federaldyq qyzmeti («Rosselhoznadzor») qazaqstandyq «Shın-Laın» kompanııasynyń úsh óndiristik kásiporny shyǵaratyn balmuzdaqtyń sertıfıkattalýyn ýaqytsha toqtatty. Bul atalǵan ónimniń Reseıge jańa jetkizilimderin ýaqytsha toqtatýdy bildiredi, dep habarlaıdy agenttik tilshisi vedomstvonyń saıtyna silteme jasap.
2026 jylǵy 30 qyrkúıekte RF Aýyl sharýashylyǵy ónimderin veterınarııalyq jáne fıtosanıtarııalyq baqylaý jónindegi federaldyq qyzmeti Qazaqstan Respýblıkasy Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıtetine resmı úndeý joldady. Reseı tarapy 1 qazannan bastap «Shın-Laın» JShS-niń úsh kásipornynda óndiriletin balmuzdaqqa veterınarııalyq sertıfıkattar berýdi ýaqytsha toqtatýdy surady.
«Rosselhoznadzordyń» úndeýinde kórsetilgendeı, Reseı tarapy kompanııanyń Reseı naryǵyna ónim jetkizetin úsh óndiristik alańy týraly aqparatty Qazaqstannan suratqan. Sheshim qabyldanǵan kezde suratylǵan málimetter usynylmaǵan.
Osyǵan baılanysty «Rosselhoznadzor» qajetti aqparat alynǵanǵa jáne reseılik vedomstvo mamandary tekserý júrgizgenge deıin sertıfıkattaýdy ýaqytsha toqtatýdy usyndy.
Osylaısha, ónimdi Reseıge jetkizý úshin qajetti jańa veterınarııalyq sertıfıkattardy rásimdeý ýaqytsha toqtatylady.
2026 jylǵy 1 qazanǵa deıin qosa alǵanda jóneltilgen balmuzdaq partııalary Reseı shekarasynan ádettegi tártippen ótkizilýi tıis.
Sondaı-aq «Rosselhoznadzor» Reseıdiń óńirlik veterınarııalyq qyzmetterine jáne atalǵan ónimmen jumys isteıtin syrtqy ekonomıkalyq qyzmetke qatysýshylarǵa qabyldanǵan sheshim týraly habarlaýdy tapsyrdy.
