Reseı Qazaqstanmen shekaralas aımaqtarda sý tasqynyna qarsy sharalar júrgizýde
ASTANA. KAZINFORM — Reseı men Qazaqstannyń Tótenshe jaǵdaılar mınıstrlikteri sý tasqynynyń aldyn alý sharalaryn ótkizip keledi. Qajet bolǵan jaǵdaıda ǵaryshtyq monıtorıng derekteri de qoldanylady, dep habarlaıdy agenttiktiń menshikti tilshisi.
Agenttik saýalyna bergen jaýapqa sáıkes, Reseı Federatsııasynyń, onyń ishinde Qazaqstan Respýblıkasymen shekaralas aımaqtarynda muz qatý kezeńi bastalǵaly ózenderdegi sý deńgeıi men muzdyń qalyńdyǵyn taldaý jumystary júrgizilip keledi.
Qysqy kezeńde Ertis, Esil jáne Jaıyq sekildi negizgi ózen basseınderinde qardaǵy sý qory qaraldy. Kóktemgi sý tasqyny kezeńinde ózenderge qansha sý keletinin boljaý úshin «Rosgıdromet» pen «Qazgıdromet» gıdrometeorologııalyq aqparatpen almasyp keledi.
Aldyn ala boljamdarǵa sáıkes, sý qoımalaryna túsetin sý kólemi jyldar boıy qalyptasqan ortasha deńgeıden de asyp túsedi dep kútilýde. Bul jaǵdaı qar erigende sý qabyldaý úshin Reseı men Qazaqstan aýmaqtaryndaǵy bógenderde bos oryn daıyndaýdy talap etedi.
Oǵan qosa, sý tasqynyn qaýipsiz ótkizý maqsatynda ózenderde muz jarý jumystary júrgizildi, bul muz keptelisteri men jerdi sý basýdyń aldyn alady.
Reseı men Qazaqstannyń shekaralas oblystaryndaǵy barlyq tótenshe qyzmetter jyl saıyn kóktemgi qar erýi bastalǵansha birlesken jattyǵýlar ótkizedi, shekaralas aımaqtar men aýdandarda tótenshe jaǵdaılar týyndaǵanda jasalatyn birlesken is-qımyldar pysyqtalady.
Reseı men Qazaqstannyń shekaralas oblystaryndaǵy TJM-niń kezekshi bólimderi kún saıyn sý deńgeıi týraly jáne basqa da jedel aqparatpen almasady. Osyndaı aqparat almasý federaldyq deńgeıde de — Reseı TJM daǵdarys jaǵdaılaryn basqarý jónindegi ulttyq ortalyǵy men Qazaqstannyń TJM respýblıkalyq daǵdarys ortalyǵy arasynda júrgiziledi.
Jyl saıyn áriptester tájirıbe almasyp, birlesken ǵylymı-tájirıbelik konferentsııalarǵa qatysady. Osylaısha 2024 jylǵy 7 qarashada Volgograd qalasynda transshekaralyq sý obektilerin birlesip paıdalaný jáne qorǵaý jónindegi Reseı-Qazaqstan birlesken komıssııasynyń XIV otyrysy ótti. Oǵan sý qoımalaryn retteý jumystaryn úılestiretin qyzmetterdiń mamandary men basshylary qatysty. Kezdesýde kóktemgi jaıylma sýdy ótkizý, transshekaralyq ózender men sý obektileri boıynsha ǵylymı-zertteý baǵdarlamalary jáne 2025 jylǵa arnalǵan jumys josparlary qaraldy. Ásirese Jaıyq ózenine basa nazar aýdaryldy.
Halyq pen aýmaqtardy tótenshe jaǵdaılardan qorǵaýǵa aqparattyq qoldaý kórsetý úshin Reseı TJM-de «Qaýip-qaterler atlasy» atty aqparattyq júıe qurylǵan. Bul júıe tótenshe jaǵdaılardyń aldyn alý men olardy joıýdyń biryńǵaı memlekettik júıesi bolyp sanalady. Júıede tótenshe jaǵdaılardyń aldyn alý jáne olardy joıý máseleleri boıynsha túrli memlekettik aqparat kózderinen derekter jınalyp, óńdeledi.
Aqparattyq júıe derekterinen bólek, Jerdi qashyqtan zondtaý derekterimen almasý da arnaıy kelisim arqyly rettelgen. Ahýal nasharlaǵan jaǵdaıda otandyq ǵarysh apparattarynyń toby iske qosylyp, halyqaralyq «Ǵarysh jáne iri apattar hartııasy» kúshine enedi. Bul hartııa shet elderdiń 17 ǵarysh agenttiginen alynǵan sýretterge qol jetkizýdi qamtamasyz etedi. Transshekaralyq tótenshe jaǵdaı qaýpi týyndaǵanda, ǵaryshtyq monıtorıng aldyn ala júrgiziledi.
Eske salsaq, buǵan deıin ShQO-da qystyń jyly bolýynan sý tasqyny qaýpi artqanyn jazdyq.