Reseı Qazaqstanmen shekarada júk jetkizilimin baqylaýdyń jańa júıesin iske qosady
ASTANA. KAZINFORM - Reseı Qazaqstanmen shekarada taýar jetkizilimin aldyn ala rastaýǵa arnalǵan ulttyq júıeni tolyq iske qospaq.
Bul týraly agenttiktiń tilshisi Reseı Qarjy mınıstrligi saıtyna silteme jasap habarlady.
Reseıdiń qarjy mınıstri Anton Sılýanov Reseı–Qazaqstan shekarasyndaǵy «Mashtakovo» ótkizý beketine baryp, SPOT júıesiniń daıyndyǵyn tekserdi.
Mınıstr baqylaý beketiniń baǵdarlamalyq jabdyqtalýyn jáne kólik aǵynyn tekserý tártibin baǵalady.
Anton Sılýanovtyń aıtýynsha, júıe kóleńkeli ekonomıkany azaıtýǵa baǵyttalǵan.
SPOT eń aldymen ımporttaýshy kompanııalardyń shynaıylyǵyn, taýar aınalymyn jáne janama salyqtardyń tólenýin baqylaýǵa múmkindik beredi.
Júıe 1 maýsymnan bastap tolyq óndiristik rejımde jumys isteı bastaıdy.
Mınıstrdiń málimetinshe, Reseı Federaldyq keden qyzmeti men Reseı Federaldyq salyq qyzmeti júıeni tolyq iske qosýǵa daıyn.
Tekserý barysynda mobıldi toptardyń jumysy da nazarǵa alyndy.
Olar tasymaldaýshylardaǵy QR-kodtyń bolýyn, aldyn ala tirkelgen júk týraly málimetterdiń qujattardaǵy aqparatpen sáıkestigin tekseredi.
Reseı tarapynyń málimdeýinshe, bul rásim birneshe mınýt qana alady jáne kólik qozǵalysyna kedergi keltirmeıdi.
Sondaı-aq júıe adal syrtqy ekonomıkalyq qyzmet qatysýshylary úshin shekarada keptelis týǵyzbaı, júk aǵynyn baqylaýǵa múmkindik beredi.
SPOT júıesi bıylǵy 6 sáýirden beri synaq rejıminde jumys istep keledi.
Júıe arqyly kásipkerler aldaǵy júk jetkizilimi týraly aldyn ala aqparat engizip, ımporttyń zańdylyǵyn rastaıtyn arnaıy QR-kod alady.
Osyǵan deıin Reseıdiń qurylys salasynda qaǵaz qujat endi qoldanylmaıtyn bolatyny týraly jazdyq.
