Reseı Qazaqstanmen energetıkalyq yntymaqtastyqty keńeıtýdi kózdep otyr
ASTANA. KAZINFORM — Reseı Qazaqstanmen energetıkalyq yntymaqtastyqty, onyń ishinde úshinshi elderdiń naryǵyna birlesip shyǵý baǵytynda keńeıtýdi josparlap otyr. Bul týraly Reseı Prezıdenti Vladımır Pýtın halyqaralyq aqparat agenttikteri basshylarymen kezdesýde málimdedi, dep habarlaıdy Kazinform tilshisi.
Kezdesý Sankt-Peterbýrg halyqaralyq ekonomıkalyq forýmy aıasynda ótip jatyr.
Jıyn barysynda Qazaqstan Respýblıkasy Prezıdenti Teleradıokesheni dırektorynyń orynbasary Asqar Jaldınov suraq qoıdy:
— Qazaqstan men Reseı arasyndaǵy ekonomıkalyq yntymaqtastyq oń serpin saqtap otyr. Jahandyq syn-tegeýrinder jaǵdaıynda eki el arasyndaǵy saýda-ekonomıkalyq baılanystardy odan ári damytý úshin ne isteýge bolady dep oılaısyz?
Bul saýalǵa jaýap bergen Vladımır Pýtın energetıka salasy ekijaqty yntymaqtastyqtyń árdaıym basty baǵyty bolǵanyn atap ótti.
— Qazir biz energııa resýrstary men gaz jetkizý aıasyn keńeıtýdi qarastyryp otyrmyz. Keńes odaǵy kezinde gaz ınfraqurylymy Reseıden Qazaqstanǵa jetkizýge beıimdelip qurylǵany belgili. Sol sebepti Qazaqstanda ózindik ınfraqurylym obektileri salynbaǵan bolatyn.
Qazir Qazaqstan Prezıdentimen energetıka salasyndaǵy yntymaqtastyqty keńeıtý múmkindikterin talqylap jatyrmyz. Biz úshinshi elderdiń naryǵyna birlesip shyǵý joldaryn, sondaı-aq qazaqstandyq munaıdy jetkizý boıynsha logıstıkalyq marshrýttardy uıymdastyrý máselesin qarastyryp otyrmyz, — dedi Pýtın.
Onyń aıtýynsha, Qazaqstan eksportyna arnalǵan munaıdyń negizgi bóligi Reseı arqyly ótedi.
— Sizder bilesizder, qazaqstandyq eksporttyq munaıdyń negizgi kólemi Reseı Federatsııasy arqyly tasymaldanady. Negizgi baǵyt – Kaspıı Qubyr Konsortsıýmy (KQK) júıesi arqyly. Taǵy basqa baǵyttar da bar. Biraq eksportqa shyǵarylatyn munaıdyń basym bóligi Reseı arqyly ótedi. Biz Qazaqstannyń munaı eksportyn ártaraptandyrýǵa múddeli ekenin túsinemiz jáne bul baǵytta qoldaý kórsetýge daıynbyz, — dedi Reseı Prezıdenti.
Sondaı-aq ol Baıqońyr ǵarysh aılaǵyn paıdalaný, spýtnıktik toptamalardy damytý jáne birlesken zertteýlerdi qamtıtyn ǵarysh salasyndaǵy ortaq jobalardy da eske saldy.
Aıta keteıik, osy jıynda Qazaqstan men Reseı arasyndaǵy taýar aınalymynyń 95%-ǵa jýyǵy ulttyq valıýtalarmen júzege asyrylatyny aıtyldy.
Buǵan deıin Vladımır Pýtın Iran men Izraıl arasyndaǵy janjaldy sheshýdiń joly týraly aıtty.
Sondaı-aq Qazaqstanmen qarym-qatynasty damytýda eshqandaı qıyndyq joq ekenin jetkizdi.
Reseı Prezıdenti UQShU qyzmetiniń eshqashan úshinshi elderge qarsy baǵyttalmaǵanyn málimdedi.