Reseı Qazaqstanǵa tórt Amýr jolbarysyn tabystaıdy
MÁSKEÝ. KAZINFORM — «Amýr jolbarysy» ortalyǵynyń dırektory Sergeı Aramılevtiń aıtýynsha, bıyl kóktemde Reseıden Qazaqstanǵa tórt amýr jolbarysyn tasymaldaý josparlanyp otyr, dep habarlaıdy agenttik tilshisi TASS-qa silteme jasap.
Janýarlardy berý amýr jolbarysyn Qazaqstanǵa ıntrodýktsııalaý jónindegi aýqymdy halyqaralyq baǵdarlama aıasynda júzege asady. Baǵdarlamany iske asyrýǵa «Amýr jolbarysy» ortalyǵy qoldaý kórsetip otyr.
Amýr jolbarystary — buryn Ortalyq Azııa aýmaǵynda mekendegen turan jolbarystarynyń eń jaqyn týystary; Qazaqstanda olar 1948 jylǵa qaraı joıylyp ketken. Atalǵan baǵdarlama arqyly respýblıkada olardyń popýlıatsııasyn qalpyna keltirý kózdelgen.
— Jóneltýge sońǵy daıyndyqtar júrgizilip jatyr. Jabaıy jolbarystarmen jumys isteýdi úırený úshin Qazaqstannyń tabıǵatty qorǵaý vedomstvolarynyń ókilderi Habarovskige keldi. Oqý — amýr jolbarysynyń tórt darasyn Qazaqstanǵa jiberýge deıingi sońǵy kezeńderdiń biri. Sırek janýarlardy tasymaldaý 2026 jyldyń kókteminde júzege asady dep josparlanyp otyr, — dedi Aramılev.
Jolbarystardyń jynysy da, jasy da ártúrli bolady. Jyrtqyshtardy berý Reseıdegi jolbarys popýlıatsııasyna áser etpeıdi, qazir olardyń sany shamamen 750-di quraıdy.
— Árbir jolbarys jabaıy tabıǵatqa jiberilgen kezde arnaıy spýtnıktik pozıtsııalaý modýli bar qarǵybaýmen jabdyqtalady. Arnaıy monıtorıng toptary olardyń qozǵalysyn baqylap, jolbarystyń qandaı janýarlarmen qorektenetinin qadaǵalaıdy. Eger treker arqyly jolbarystyń qandaı da bir eldi mekenderge jaqyndap kele jatqany baıqalsa, munyń aldyn alý sharalary qabyldanady, — dedi ol.
«Ohotzooprom» RMK ortalyq óńirlik fılıalynyń basshysy Murat Rymjanov jolbarystar «Іle-Balqash» memlekettik tabıǵı rezervatynda tabıǵatqa jiberiletinin atap ótti.
— 2018 jyly Balqash kóliniń mańynda erekshe qorǵalatyn aýmaq — rezervat quryldy. Ǵalymdar jolbarystardyń damýyna qolaıly oryndy dál osy jerden anyqtady. Bul jer alys ornalasqan, qorek qory bar jáne tirshilik etýge qajetti jaǵdaılar jasalǵan. Barlyǵy jaqsy bolady dep oılaımyn, — dep naqtylady ol.
Habarovskide qazaqstandyq mamandar qajetti hattamalardy meńgerdi: qoldanylatyn jabdyqtyń erekshelikteri men ony ornatýdan bastap, jyrtqyshty dári-dármek qoldana otyryp ýaqytsha qozǵalmaıtyn kúıge keltirý protsedýrasyna deıin. Munyń bárin olar Habarovsk ólkesiniń ańshylyq qadaǵalaý ınspektorlary júrgizgen amýr jolbarysyn aýlaý, veterınarlyq tekserý jáne tabıǵatqa jiberý barysynda úırendi.
Budan buryn Amýr jolbarysyn Qazaqstan tabıǵatyna beıimdeý jospary qabyldanǵany belgili boldy.