Reseı Qazaqstanǵa Saryshaǵandaǵy polıgonnyń 1 mln. gektar jer ýchaskesin qaıtarady
ASTANA. QazAqparat - Búgin Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti.
Onda «1995 jylǵy 20 qańtardaǵy Qazaqstan Respýblıkasy men RF arasyndaǵy Saryshaǵan synaq polıgonyn paıdalaný men jalǵa berý sharttary jáne Prıozersk qalasynyń tirshilik áreketin qamtamasyz etý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasy talqylandy.
«Kelisimde qarastyrylǵan ózgeristerdiń maqsaty Qaraǵandy, Qyzylorda, Jambyl jáne Aqtóbe oblystarynyń aýmaǵynda jalpy alańy 1 mln. gektardan astam polıgon jer ýchaskelerin jaldaýdan shyǵarý bolyp tabylady. Reseı tarapyna polıgon boıynsha naqty qajetti jer ýchaskelerin anyqtaý, áskerı polıgondardyń alańyn qaıta qaraý týraly tapsyrmany Elbasy júktegen bolatyn. Budan bólek, jekelegen ýchaskelerdi jaldaýdan shyǵarý týraly bastamany múddeli memlekettik organdar men tıisti oblystar ákimdikteri kóterdi », - dedi QR Qorǵanys mınıstriniń orynbasary Oqas Saparov.
Onyń aıtýyna qaraǵanda, zań jobasynda jaldaýdan birqatar jer ýchaskelerin shyǵarý kózdeledi. Olar: tústi metaldy óńdeý úshin Qaraǵandy oblysyndaǵy Jamanaıbat ýchaskesi, Beıneý-Jezqazǵan temirjolyn jáne Samara-Shymkent avtokólik joldaryn paıdalanýdyń qaýipsizdigin qamtamasyz etý úshin Aqtóbe, Qaraǵandy, Qyzylorda oblystaryndaǵy jekelegen ýchaskeleri bar.
«Budan bólek, A-313 jáne A-73 halyqaralyq avıatsııalyq trassalardy túzetý maqsatynda 711 myń 290 gektar jer jaldaýdan shyǵarylady», - deıdi O. Saparov.
Zań jobasy Parlament Senatynyń aldaǵy ýaqytta ótetin jalpy otyrysyna shyǵarylatyn bolady.
