Reseı Qazaqstanǵa otyn satyp alý týraly ótinish túsirdi me — mınıstrlik jaýap berdi
ASTANA. KAZINFORM — Reseı tarapy Qazaqstannan otyn satyp alý jóninde Energetıka mınıstrligine resmı ótinish joldaǵan joq. Bul týraly brıfıng barysynda jýrnalısterdiń saýalyna jaýap bergen QR Energetıka vıtse-mınıstri Qaıyrhan Tutqyshbaev málim etti.
Jýrnalısterdiń Reseıden otyn satyp alý jóninde Qazaqstanǵa usynys túsken-túspegeni týraly suraǵyna jaýap bergen vıtse-mınıstr qazirgi ýaqytta mınıstrlikke resmı ótinish kelmegenin aıtty.
— Reseı Federatsııasynan Energetıka mınıstrliginiń atyna resmı ótinish túsken joq. Eger mınıstrlikke osyndaı ótinish kelip tússe, ony ulttyq múddelerdi eskere otyryp jáne ózara tıimdi sharttar negizinde qaraıtyn bolamyz, — dedi Qaıyrhan Tutqyshbaev.
Osyǵan deıin QR Energetıka mınıstrligi Reseı Federatsııasyna janar-jaǵarmaı ónimderin jetkizý múmkindigi týraly taraǵan aqparatqa baılanysty túsinikteme jasady.
Aıta keteıik, Qazaqstandaǵy benzın, dızel jáne avtogaz baǵasy qandaı ekenin jazǵanbyz.
