Reseı Qazaqstandaǵy AES qurylysyna baılanysty usynys jasady
ASTANA.AKAZINFORM - «Rosatom» Qazaqstanda atom elektr stantsııasyn salýǵa óz quzyretin berýge daıyn. Bul týraly Qazaqstanǵa jumys saparynyń qorytyndysy boıynsha ótken baspasóz máslıhatynda Reseı Syrtqy ister mınıstri Sergeı Lavrov aıtty, dep jazady TASS.
«Reseı (AES qurylysyna) kómektesýge daıyn ǵana emes, Reseı óz usynystaryn jasap ta qoıdy. Biz Qazaqstan Prezıdenti Qasym-Jomart Toqaev ótkizgen referendýmda onyń atom energetıkasyn damytý josparlarynyń qoldaý tapqanyn kórdik. «Rosatom» bul máseleni qazaqstandyq áriptestermen sheshý úshin óz quzyretin tolyq qamtamasyz etýge daıyn», – dedi Sergeı Lavrov.
Lavrov sondaı-aq Reseıdiń «basqa memleketterdiń tıisti mekemelerimen jáne qurylymdarymen yntymaqtasýǵa» daıyn ekenin aıtty.
Aıta keteıik, referendým qorytyndysy boıynsha Qazaqstandaǵy atom elektr stantsııasynyń qurylysyna azamattardyń 71,12 paıyzy daýys bergen.
Atom elektr stantsııasynyń qurylysy jobasyn júzege asyrýǵa qyzyǵýshylyq tanytqan reaktorlar tehnologııasyn jetkizýshilerdiń qysqasha tizimi qazirdiń ózinde qalyptasty. Tizimge álemniń jetekshi tórt kompanııasy kiredi: frantsýzdyq EDF, Reseıdiń «Rosatom» memlekettik korporatsııasy, koreıalyq KHNP jáne qytaılyq CNNC.
Qazaqstan Prezıdenti Qasym-Jomart Toqaev budan buryn frantsýzdyq «Le Figaro» gazetindegi «Qazaqstan Frantsııanyń strategııalyq jáne senimdi seriktesi» atty maqalasynda atom elektr stantsııasyn salý týraly sheshim qabyldanǵannan keıin Qazaqstan Frantsııanyń atom ónerkásibine qoldaý kórsetetinin aıtqan bolatyn.
Ońtústik Koreıa prezıdenti ıÝn Sok El de koreıalyq kompanııalardyń Qazaqstandaǵy atom energetıkasy jobalaryna qyzyǵýshylyq tanytatynyn málimdedi.
Bul rette Memleket basshysy buǵan deıin Qazaqstanda atom elektr stansasyn halyqaralyq konsortsıým salý kerektigin atap ótken bolatyn. Atom elektr stantsııasyn salý jobasy boıynsha jetkizýshini nemese konsortsıýmdy tańdaý boıynsha túpkilikti sheshim 2025 jyly qabyldanady, dep habarlady Energetıka mınıstrligi.
Aıta keteıik, Memleket basshysy Reseıdiń Syrtqy ister mınıstri Sergeı Lavrovty qabyldady.
